मकवानपुर, ३ साउन ।
गजल मञ्च चितवनका अध्यक्ष रामकृष्ण अनायासको गजलसङ्ग्रह ‘अनायास’ विषयक विमर्श कार्यक्रम मकवानपुरमा सम्पन्न भएको छ।

गजल मञ्च मकवानपुरको २२६औँ गजल यात्राअन्तर्गत साहित्य सङ्गम मकवानपुरको हलमा शनिबार आयोजित उक्त कार्यक्रम मञ्चका अध्यक्ष सञ्जित श्रेष्ठको अध्यक्षतामा सम्पन्न भयो। कार्यक्रममा बोल्दै युवा गजलकार विश्वनाथ सञ्जेलले रामकृष्ण अनायासका गजलहरू युवावयका कथाहरूलाई सजीव चित्रण गर्ने र समसामयिक विषयवस्तुमा तीक्ष्ण प्रहार गर्ने खालका रहेको उल्लेख गर्दै प्रशंसा गर्नुभयो। उनले भन्नुभयो, “सङ्ग्रहमा युवावयका कथाहरू सशक्त रूपमा अभिव्यक्त भएका छन्। गजलहरूले बेथितिमाथि गहिरो प्रहार पनि गरेका छन्।”

त्यसैगरी, गजल मञ्च चितवनका पूर्व अध्यक्ष एवं समालोचक रमेश प्रभातले ‘अनायास’ गजलसङ्ग्रहको सफलताको शुभकामना व्यक्त गर्दै नेपाली गजल लेखनको परम्परा र यसको विकासक्रमबारे चर्चा गर्नुभयो।

कार्यक्रमका प्रमुख आकर्षणमध्ये एक रहे, स्वयं रामकृष्ण अनायासद्वारा भर्खर प्रकाशित कृति ‘अनायास’ बाट आधा दर्जन गजलहरूको वाचन। उनका गजलहरू खचाखच भरिएको हलमा गुन्जिँदा ताली र ‘वा वा’ को गुञ्जनले वातावरण उत्साहपूर्ण बनेको थियो।

गजल मञ्च मकवानपुरका पूर्व अध्यक्ष देवराज तिवारीले शुभकामना मन्तव्यसहित गजल प्रस्तुत गर्नुभएको थियो। उपाध्यक्ष हरि पौडेलले स्वागत मन्तव्य राख्नुभएको यस कार्यक्रमलाई कमल नेपाल र गौरी कँडेलले कुशलतापूर्वक सहजीकरण गर्नुभएको थियो भने गजल मञ्च चितवनका नि वर्तमान अध्यक्ष लेखराम सापकोटाले शुभकामना मन्तव्य राखेका थिए ।

जनप्रिय माध्यमिक विद्यालयका प्रधानाध्यापक भुपेन्द्र चौलागाईँले आफ्नो जन्मदिनमा १ सय ४५ पुस्तक विद्यालयलाई हस्तान्तरण गर्नु भएको छ । अघिल्ला सालहरूमा समेत पुस्तक हस्तान्तरण गर्दै आउनु भएका उहाँले ती पुस्तकहरू जनप्रिय रिडर्स क्लब मातहत रहनेगरी विद्यालयलाई उपलब्ध गराउनु भएको हो ।

जनप्रिय रिडर्स क्लबकी अध्यक्ष शिक्षा गौतमलाई पुस्तक हस्तान्तरण गर्दै चौलागाईँले जनप्रियले चालेको अभियानले विद्यार्थीहरूको मानसिक क्षमतामा अभिवृद्धि गर्ने, पठन संस्कृतिले डिजिटल डिभाइसको अति प्रयोगलाई विस्थापन गर्ने, तार्किक क्षमतामा वृद्धि गर्दै वैयक्तिक विकासमा योगदान पुर्‍याउनेमा विश्वस्त रहेको बताउनुभयो ।

१६ नम्बर वडाका वडा सदस्य गुरुप्रसाद ढकाल, विव्यस अध्यक्ष मोहनप्रसाद बस्ताकोटी, शिक्षक अभिभावक सङ्घका अध्यक्ष गीताप्रसाद दुलाल, विभिन्न समितिका सदस्य तथा शिक्षकहरूका साथ हस्तान्तरण कार्यक्रम गरिएको छ । अतिरिक्त विभाग संयोजक युक्तलाल विश्वकर्माले शुभकामनासाथ पुस्तकले सूचना र ज्ञानगुनका कुरा दिने अनि भविष्यको मार्गदर्शन गर्ने बताउँदै विद्यार्थीहरूलाई धेरै सुन्न र थोरै अनि आवश्यक बोल्नका लागि सन्देश दिनुभयो ।

साहित्य तथा बौद्धिक विभाग संयोजक संप्रस पौडेलले पठन संस्कृतिको खास रूप नै कक्षाको लाइब्रेरी रहेकोले पुस्तकहरू कक्षा-कक्षामैँ रहनेगरी उपहार प्राप्त हुने क्रम बढ्दै गएको र यसले विद्यार्थीहरूमा पढ्ने र त्यसबारे छलफल गर्ने आनिबानीको विकास भएको, निडर भएर बोल्ने क्षमताका साथै लेखनसीपमा सकारात्मक सुधार हुँदै गएको बताउनुभयो ।

विद्यालयका विभिन्न कक्षाहरूमा रहेको बुक र्‍याकमा पुस्तक राख्ने उद्देश्यले ‘एक व्यक्ति एक पुस्तक हस्तान्तरण कार्यक्रम’ अन्तर्गत शिक्षक, अभिभावक, विद्यार्थी, साहित्यकार, साहित्यसेवीहरूमार्फत् पुस्तक उपलब्ध भइरहेको छ । विद्यार्थीहरूले खाली घण्टीमा अध्ययन गर्ने, घरमा लगी अध्ययन गर्ने गरेका छन् भने अघिल्ला वर्षदेखि पुस्तक पढेपश्चात् त्यसबारे समीक्षा समेत गर्ने गरिएको छ ।

आदिकवि भानुभक्त आचार्यको २१२अ‍ौँ जन्मजयन्तीको अवसरमा साहित्य सङ्गम मकवानपुरले आयोजना गरेको जिल्ला स्तरीय कविता प्रतियोगितामा हेटौँडा एकेडेमीका रोज कार्की प्रथम हुनुभएको छ ।

जनप्रिय माध्यमिक विद्यालयको व्यवस्थापनमा आयोजित कार्यक्रममा बालजागृति इङ्लिश सेकेण्डरी स्कुलकी आश्रिका न्यौपाने द्वितीय, अमर माध्यमिक विद्यालयकी रोशिका भट्टराई तृतीय र गोरक्षनाथ माविकी छात्रा इन्दिरा विश्वकर्मा तृतीय हुनुभएको हो ।

पुरस्कृत प्रतियोगीहरूलाई प्रथम द्वितीय तृतीय र सान्त्वनाका लागि सम्मानपत्रका साथमा क्रमश: २ हजार, १ हजार ५ सय, १ हजार र ५ सय रूपैयाँ पुरस्कार प्रदान गरिएको थियो ।

पुरस्कृत चारैजना कविहरूलाई जनप्रिय माध्यमिक विद्यालयमार्फत् एकएक प्रति कविताका पुस्तकहरू पुरस्कार प्रदान गरिएको थियो भने नगद पुरस्कार साहित्यसेवी सुमन गौतमले उपलब्ध गराउनुभएको हो ।

भानुभक्त आचार्य प्रतिष्ठान बागमती प्रदेशका संयोजक हयग्रीव आचार्यको प्रमुख आतिथ्य रहेको कार्यक्रम साहित्य सङ्गम मकवानपुरका अध्यक्ष डिबी बर्तौलाको सभाध्यक्षतामा सम्पन्न भएको हो ।

भानुभक्त आचार्यको प्रतिमामा माल्यार्पण गरी सुरु भएको कार्यक्रममा वडा नम्बर १६ का वडाध्यक्ष रामकृष्ण कोइराला विशिष्ट अतिथि रहनुभएको कार्यक्रममा झसाप अध्यक्ष विश्वनाथ सन्जेल, नेलेसं मकवानपुरका अध्यक्ष माधव पोखरेल, सिस्नुपानी मकवानपुरका निवर्तमान अध्यक्ष राजकुमार लामिछाने, मुक्तक मञ्च मकवानपुरका सचिव सुबास सजल, मूर्तिकार ओमभक्त भण्डारी आदि अतिथि रहनुभएको थियो ।

विव्यस अध्यक्ष मोहन प्रसाद बस्ताकोटी, सदस्यद्वय इन्द्र प्रसाद खतिवडा र गोविन्द दुलालका साथै प्रअ भूपेन्द्र चौलागाईं, नेपाली भाषा समिति मकवानपुरका उपाध्यक्ष अनिता तिमल्सिनाको आतिथ्यमा आयोजित कार्यक्रममा अध्यक्ष बस्ताकोटीले साहित्यसँग मकवानपुरले विश्वास गरी कार्यक्रम आयोजना गरेकोमा आउँदा दिनहरूमा समेत यस्ता कार्यक्रमका लागि सहकार्य गर्न विद्यालय तयार रहेको बताउँदै प्रतियोगीहरूलाई बधाईका साथ उपस्थित सम्पूर्णलाई धन्यवाद ज्ञापन गर्नुभयो ।

कार्यक्रममा निर्णायकद्वय घनश्याम घिमिरे र देवीराम लामाका साथै भानुभक्तका परिचर्चाकार सुनिल गौतम, जनप्रिय मावि, जनप्रिय रिडर्स क्लबकी अध्यक्ष शिक्षा गौतमलगायतलाई मायाको चिनो प्रदान गरियो ।

सङ्गमका सदस्य संप्रस पौडेलले स्वागत गर्नुभएको कार्यक्रममा भानुभक्त आचार्य बारे साहित्यकार सुनिल गौतमले परिचर्चा गर्नुभयो भने कार्यक्रमलाई सङ्गमका सचिव मनोज पोखरेलले सहजीकरण गर्नुभएको हो ।