२४ चैत्र, मकवानपुर
नवसाहित्य अनलाइन । मकवानपुरकी साहित्य स्रष्टा मुना धिताल अर्याललाई पल्लव साहित्य प्रतिष्ठानले सम्मान गर्ने भएको छ ।
पल्लव राष्ट्रिय साहित्य प्रतिष्ठान भरतपुर, चितवनले साहित्य सम्मान-२०८० समारोहमा उहाँलाई सम्मान गर्न लागेको हो ।
मकवानपुर जिल्ला हेटौँडा-२ निवासी मुना धिताल अर्याललाई नेपाली साहित्य लेखन क्षेत्रमा दिनु भएको योगदानका लागि युसुफदिन-हलिमा पुरस्कार, रोगकुमारी रिजाल स्मृति पुरस्कार तथा पल्लव राष्ट्रिय साहित्य सम्मान-२०८० ले सम्मान गर्ने भएको हो । कार्यक्रममा प्रा.डा. देवी नेपालको प्रमुख आतिथ्यता रहने आयोजकले जानकारी दिएको छ ।
अर्याल ओशोको जीवन कथामा आधारित छन्दोवद्ध महाकाव्य ‘महाकाश’ (२०८०) को कृतिकार हुनुहुन्छ । सोअघि उहाँको ‘आत्म सलिल’ महाकाव्य (२०७६) प्रकाशनमा आएको थियो भने २०६० सालमा अनुवाद कृति ‘ईश्वराम्मा’ प्रकाशनमा आएको थियो ।०००
महाकाव्यकार मुना धिताल अर्याललाई नवसाहित्य अनलाइन परिवार बधाई तथा शुभकामना प्रकट गर्दछौँ ।