१४ चैत्र, मकवानपुर / –नवसाहित्य अनलाइन । सिस्नुपानी नेपाल मकवानपुरले हास्यव्यङ्ग्यकार उत्तमकृष्ण मजगैयाँ र अनिल पौडेल कीर्तेलाई सम्मान गर्ने भएको छ ।
संस्थाको स्थापना दिवसको अवसरमा बैशाख १९ गते स्व. गणेशकुमार पौडेलका परिवारजनबाट स्थापित ‘गणेश पौडेल स्मृति हास्यव्यङ्ग्य साहित्य सम्मान २०८०’ दाङका हास्यव्यङ्ग्य सर्जक मजगैयाँ र सल्लाहकार आरसी रिजालद्वारा स्थापित ‘हास्यव्यङ्ग्य प्रतिभा पुरस्कार २०८०’ मोरङका ‘कीर्ते’ लाई प्रदान गरिने संस्थाका अध्यक्ष राजकुमार लामिछानेले जानकारी दिनु भएको छ ।
साथै बैठकले ‘भैरव अर्याल स्मृति सम्मान २०८०’ प्राप्त गर्ने संस्थाका उपाध्यक्ष मीनप्रसाद लामिछाने र ‘मुक्ति-तारा साहित्य सम्मान २०८०’ प्राप्त गर्ने संस्थाका सदस्य सानुभाइ बिश्वकर्मालाई बधाई ज्ञापन गरिएको संस्थाका सहसचिव संप्रस पौडेलले जानकारी दिनु भएको छ ।
बुधबार संस्थाका अध्यक्ष राजकुमार लामिछानेको अध्यक्षतामा बसेको बैठकले सिस्नुपानी दिवसको अवसरमा विविध हास्यव्यङ्ग्यात्मक विषयवस्तु प्रस्तुति गर्ने निर्णय गरेको छ ।
संस्थाले कार्तिक महिनामा आयोजना गरेको देउसी-भैलो कार्यक्रमबाट सङ्कलित रकममध्ये १५ हजार रुपैयाँ जाजरकोट तथा रूकुम पश्चिममा भूकम्पपीडितका लागि सहयोग गर्ने निर्णय भएको अध्यक्ष लामिछानेले जानकारी दिनुभयो ।