जेठ ८ मङ्गलबार
नवसाहित्य अनलाइन । नवसर्जक साहित्य चौतारी नेपाल केन्द्रिय समितिले विद्यार्थीकेन्द्रित लघुकथा लेखन कार्यशाला आयोजना गर्ने भएको छ ।
कक्षा ६ देखि १२ सम्मका विद्यार्थीहरू सहभागी गराइने कार्यशालाका क्रममा एकाइ समिति घोषणा कार्यक्रम समेत गराइने आयोजकले जानकारी दिएको छ ।
कार्यशालाका लागि इकाइ समिति मार्फत् आगामी दिनमा अनलाइन/अफलाइन माध्यमबाट नियमित साहित्यिक प्रशिक्षणमा सहभागी गराई बालबालिकालाई थप सिर्जनशील बनाउने उद्देश्यले कार्यक्रम सञ्चालन गर्न लागिएको संरक्षक दीपक गौतमले जानकारी दिनु भएको छ ।
जेठ १० गते ब्रह्मदिक एकेडेमीमा आयोजना गरिने कार्यक्रमका लागि प्रतिविद्यालय रु. ५ सय शुल्क लाग्ने र यसका लागि संस्थागत विद्यालयतर्फ दीपक गौतम तथा सामुदायिक विद्यालयतर्फ डिबी बर्तौलालाई सम्पर्क व्यक्ति तोकिएको छ ।
नवसर्जक साहित्य चौतारी साहित्य लेखनमा विद्यालय तहदेखि नै सहभागिताका लागि प्रशिक्षण, रचना वाचन, लेखन लगायतका कार्यमा सक्रिय संस्था हो । जसलाई नवसर्जकहरूले नै नेतृत्व गरी नियमित कार्यक्रमहरू सञ्चालन गर्दै आइरहेका छन् ।