जेठ ८, मङ्गलबार
नवसाहित्य अनलाइन । यो साता मकवानपुरमा आयोजना हुँदै गरेका केही साहित्यिक गतिविधिबारे हामीले जानकारीमूलक सामग्री तयार पारेका छौँ ।
जेठ ९:
नवसर्जक साहित्य चौतारीद्वारा लघुकथा लेखन कार्यशाला आयोजना गरिने भएको छ । जेठ १० गते बिहान ११:०० बजे कक्षा ६ देखि १२ सम्मका विद्यार्थीकेन्द्रित यस कार्यशाला ब्रह्मदिक एकेडेमीमा हुन लागेको हो । अनलाइन तथा भौतिक विविध माध्यमबाट लेखन, वाचन तथा प्रतियोगितात्मक कार्यक्रमहरूमा सक्रिय यस संस्थाले नवसर्जकहरूमा साहित्यसम्बन्धी चासो र लेखन कलाको विकासका विविध कार्यक्रमहरू गर्दै आइरहेको छ ।
जेठ १०:
किताबघरले यो साता भक्त स्याङ्तानको कथा सङ्ग्रह ‘डम्फुको आत्मालाप’ माथि परिचर्चा कार्यक्रम आयोजना गर्ने भएको छ । समीक्षक घनश्याम घिमिरेको समीक्षा रहने कार्यक्रम जेठ १० गते दिनको ३:०० बजे रोयल प्यालेस हेटौँडामा गर्न लागेको हो ।
जेठ १२:
साहित्य सङ्गम मकवानपुरको आयोजनामा विशेष कविता वाचन कार्यक्रम हुने भएको छ । सङ्गमको ३४३औँ नियमित साहित्य सन्ध्याका क्रममा पत्रकार रामकुमार एलनका कविताहरू सुन्न पाइनेछ । जेठ १२ गते बिहान ११:०० बजे साहित्य सङ्गम तथा सिस्नुपानी नेपाल मकवानपुरको संयुक्त सभाहलमा सो कार्यक्रम आयोजना हुन लागेको हो ।