जेठ ९, मङ्गलबार
नवसाहित्य अनलाइन । रोल्पा नगरपालिका, नगर साहित्य, कला तथा सङ्गीत प्रतिष्ठान, रोल्पाको आयोजनामा यही जेठ ११ र १२ गते रोल्पाको लिवाङमा रोल्पा सिर्जना महोत्सव आयोजना हुँदैछ ।
पाँचौँ संस्करणको सो कार्यक्रमका क्रममा रोल्पा कविता प्रतियोगिताका लागि कूल १६३ कवितामध्ये पहिलो मूल्याङ्कनबाट उत्कृष्ट १० कविताहरू छनोट भएका छन् ।
छनोट भएका कविताका सर्जकहरू मकवानपुरका ३ जना अनिता न्यौपाने (हल्ला नगर्नुस् न, नानीहरू खेलिरहेछन्), संगीता थापामगर (तिलहरी) र सुबास सजल (ऐँठन) रहनु भएको छ ।
यस्तै अन्य सर्जकहरूमा अन्जान प्रदीप, अविनाश भट्टराई, अनिल अदृष्य, दिपिन सिजापति, श्रवनकुमार नेपाली, रेणुका जिसी र दिपेश थापा रहेका छन् ।
हाल उत्कृष्ट १० मा सफल भएका कविहरू अन्जान प्रदीप र अनिल अदृष्यका कविता अघिल्लो सँस्करणमा समेत उत्कृष्ट घोषित भएका थिए । तत्पश्चात् अञ्जान प्रदीप सान्त्वना हुनु भएको थियो । यस्तै तेस्रो सँस्करणमा तृतीय स्थान प्राप्त सुरज पराजुली चौथो सँस्करणमा १६५ कवितामध्ये ‘अभिनय’ कवितामार्फत् सर्वोत्कृष्ट घोषित हुनु भएको थियो ।
प्रकाशित सूचनामा यसअघि प्रकाशन गरिएको उत्कृष्ट दश सूचिमा सम्मिलित एउटा कविता प्रतियोगिताको मापदण्ड विपरीत पहिले नै अर्को कुनै प्रतियोगितामा भाग लिई पुरस्कृत समेत भएको उजुरी (प्रमाण) का आधारमा सूचीबाट हटाएर वैकल्पिकमा रहेको पहिलो कवितालाई दश कविता सूचिमा समावेश गरिएको जानकारी गराइएको छ ।