जेठ २०, आइतबार
नवसाहित्य अनलाइन । ‘प्रश्न’ र ‘फेसिङ अ भोल्क्यानो’ पछि लेखक उदय अधिकारीद्वारा लिखित नवीन पुस्तक अविश्रान्त लखर लखर बजारमा आइपुगेको छ ।
पठन र लेखनमा नयाँ पुस्तालाई समेत उत्प्रेरित गर्दै गर्ने अधिकारीद्वारा लिखित ‘प्रश्न’ पुस्तकमा नेपालमा ६ लेखकहरूको लेखन यात्रा प्रवेश, प्रेरणा, प्रभाव र अनुभवसम्बन्धि विचारहरू अन्तर्वार्तात्मक शैलीमा प्रकाशन भएका छन् । अभि सुवेदी, नारायण ढकाल, सरूभक्त, श्यामल, मनु मञ्जिल र श्रवण मुकारूङसँगका कुराकानीलाई पुस्तकाकार गर्नु भएका अधिकारीको पछिल्लो पुस्तकमा भने साहित्य सर्जक तथा समीक्षक खगेन्द्र सङ्ग्रौलासँगको प्रश्नोत्तर सम्वाद उल्लेख गरिएको अधिकारीले बताउनु भएको छ ।
पुस्तकको एक अंशः
मेरा यी यावत् कर्म यी थरीथरीका पीडितजनउपर गरिएका कृपा होइनन् । मेरा यी कर्म कसैका हुकुम वा अह्रनखटनबाट निर्देशित होइनन् । यी सब मेरो आफ्नै विवेकको आदेशबाट निर्देशित हुन् । जीवनको रङ्गमञ्चमा म जे छु, म यस्तो बन्नुमा यी सबै पीडितहरूको एक न एक प्रकारको प्रत्यक्ष वा परोक्ष हात छ । कसैको भौतिक सहयोगको हात होला, कसैको भावनात्मक शुभेच्छाको हात होला, कसैको मङ्गलकामनाको हात होला । जीवनयात्रामा यी कसैले मलाई टुकुटुकु डोर्याए होलान्, कसैले मलाई गाँस काटेर खुवाए होलान् । कसैले मलाई आफ्ना भागको अवसर दिए होलान्, कसैले मलाई आफ्नो आयु काटेर दिए होलान् । कसैले जोखिमपूर्ण जीवनपथका खाल्डामाथि आफ्ना ज्यानको फड्के हालेर मलाई तारिदिए होलान्, कसैले मृत्युछेवैको भयावह खतराबाट मलाई बचाए होलान् । जीवनमा म जस्तो छु, यी यावत् जनको भौतिक र आत्मकि साथ र हात एवम् शुभेच्छा र सद्भावले गर्दा नै त म यस्तो छु । जीवनमा शिक्षा र स्वास्थ्य, पहिचान र प्रतिष्ठा एवम् सम्मान र गरिमाका लागि जति अवसर र सुविधा मैले पाएँ, ती अवसर र सुविधाबाट मेरै वरिपरिका कतिकति मानिस वञ्चित छन् । यी सकल पीडित र वञ्चित जनको न्यायको पक्षमा सडकमा यदाकदाको लखरलखर मेरो सामाजिक र नैतिक कर्तव्य हो । जनजनको देखिने र नदेखिने गुनको केवल सानो पैँचो तिराइ हो यो ।
राजन मुकारूङद्वारा लिखित वर्ष २०६९ मा मदन पुरस्कार प्राप्त कृति ‘दमिनी भीर’ तथा यस्तै पहिचान पुरस्कार २०८० प्राप्त कृतिद्वय प्रगति राइकृत ‘थाङ्ग्रा’ र प्रकाश गुरागाइँकृत ‘जङ्सन पिपलबोट’ आदि फिनिक्स प्रकाशनद्वारा प्रकाशित कृतिहरू हुन् । काङमाङ नरेश राईको ‘पानी पतिया’, मोहन मैनालीको ‘उपल्लो थलो’ ललित विष्टको ‘मोहपथ’ आदि यस प्रकाशनका उत्कृष्ट कृतिहरूभित्र रहेका छन् ।
पुस्तकका सम्बन्धमा महेश पौड्याल भन्नुहुन्छ- “तिखा सवाल सोधेर भित्रैसम्म उदिन्ने अन्तरवार्ताकार अधिकारीले अरिँङ्गालकै गोलो ताकेका छन् ।”
यस्तै खुमनारायण पौडेल भन्नुहुन्छ- “साहित्यका गहन अध्येता अधिकारीको नवीनतम पुस्तक अविश्रान्त लखरलखरले बौद्धिक पाठकको जिज्ञासालाई असीमित आल्हाद दिनेछ ।”
एलबी क्षेत्री भन्नुहुन्छ- “वरिष्ठ साहित्यकार खगेन्द्र संग्रौलासँगको प्रश्नोत्तर संवाद पुस्तकको आकार लिएर बजारमा आइपुगेको छ । यो नेपाली साहित्यका विद्यार्थीका लागि खुसीको कुरा हो र उदय अधिकारी पुनः बधाईका पात्र भएका छन् । हामी सबैलाई ‘अविश्रान्त लखर लखर’ को माध्यमबाट खगेन्द्र सङ्ग्रौलाका रेडीमेड विचार पढ्ने अवसर प्राप्त भएको छ ।”
पुस्तकमा सङ्ग्रौलाका साहित्यिक र राजनीतिक जीवनका उतारचढाव उल्लेख गरिएका छन् । हामी पहिले मानिस हुने कि जात हुने भन्ने बहस पनि पुस्तकले समेटेको लेखक अधिकारीले जानकारी दिनु भएको छ । पुस्तक अन्तर्वार्ता शैलीमा लेखिएको उहाँले बताउनु भएको छ ।
साहित्यिक कार्यक्रममा समयमैँ उपस्थिति हुने, समीक्षात्मक टिप्पणी राख्ने, लेखन र पठनका लागि ऊर्जा दिइरहने अधिकारीको तेस्रो पुस्तक फिनिक्स बुक्सले बजारमा ल्याएको हो भने यसको मूल्य ३ सय ९९ रुपैयाँ राखिएको छ ।