नवसाहित्य अनलाइन ।
रेडियो कान्तिपुरले पप सम्राट ओमविक्रम विष्टलाई दीर्घ साधना सम्मान प्रदान गरेको छ । रेडियो कान्तिपुरले शुक्रबार आयोजना गरेको ‘नेसनल म्युजिक अवार्ड्स–२०८०’ को अवसरमा गायक विष्टलाई दीर्घ साधना सम्मान (लाइफ टाइम अचिभमेन्ट) प्रदान गरिएको हो ।
नेपालमा पपका साथै अनप्लग रेकर्डिङ भित्र्याउने विष्टलाई पाँच दशकदेखि यो विधामा गरेको साधनाको कदर गर्दै रेडियो कान्तिपुरले सम्मान गरेको हो । नेशनल म्युजिक अवार्डको छैटौँ संस्करणमा विभिन्न १३ विधामा गीत सङ्गीतका सर्जकहरूलाई सम्मान गरिएको थियो ।
२०७९ साउनदेखि २०८० असार मसान्तसम्म रेडियोबाट प्रसारण भएका गीतलाई आधार मानी मनोनयनमा परेका स्रष्टा र सर्जकमध्ये सर्वोत्कृष्ट १३ जनालाई काठमाडौंमा शुक्रबार आयोजित कार्यक्रममा सम्मान गरिएको हो ।
उत्कृष्ट ‘नवगायक/नवगायिका’ को अवार्ड गायक सुरेश ढुंगानाले जितेका छन् । प्रभा अधिकारीको शब्द, सत्य र स्वरुपराज आचार्यको सङ्गीत रहेको ‘ए रात’ उहाँकै स्वरमा रहेको छ । यस्तै उत्कृष्ट रचनाकारतर्फ प्रदीप मैनालीले ‘के लत बस्यो’ बाट अवार्ड उचाल्नु भएको छ । सो गजलमा तिलकसिंह पेलाको स्वर र सङ्गीत रहेको छ ।
उत्कृष्ट म्युजिक निर्देशनतर्फ ‘ढुङ्गा जस्तो’ बोलको गीतबाट महेश खड्काले अवार्ड पाउनु भएको छ । सुवास चन्द्र ढुङ्गेलको शब्द रहेको यस गीतमा गायक प्रमोद खरेलले आवाज दिनु भएको छ ।
शान्तिश्री परियारले उत्कृष्ट लोकदोहोरी गायिकाको अवार्ड पाउनु भएको छ । नेत्र अर्यालको शब्द रहेको ‘माझी दाइ’ गीतमा खेम सेञ्चुरीको सङ्गीत रहेको छ । यस्तै उत्कृष्ट लोक गायकको विधामा ‘सकम्बरी’ बाट प्रकाश सपुत, उत्कृष्ट पार्श्र्व गायिका बेनिशा पौडेलले ‘नाइँ नभन्नु ल ६’ को ’दिउँला माया’ बाट, उत्कृष्ट पार्श्र्व गायकतर्फ एसडी योगीले ’बेमौसमी’ बाट अवार्ड प्राप्त गर्नु भएको छ ।
उत्कृष्ट आधुनिक गायिकाको अवार्ड ’कयौं दुःख’ बाट सङ्गीता राना, रचनाका साथै उत्कृष्ट आधुनिक गायकतर्फ ‘के लत बस्यो’ बाट तिलकसिंह पेला, उत्कृष्ट ब्यान्डको विधा ‘अपरिभाषित’ बाट ’स्वर’, उत्कृष्ट पप गायिकामा ’बानी’ बाट सुवानी मोक्तान, सुशान्त केसीले ’सारंगी’ बाट उत्कृष्ट पप गायकको अवार्डका साथै ’जे छौ तिमी’ बाट ’पिपल्स च्वाइस’ अवार्ड (भोटिङमार्फत्) स्वप्न सुमन र समीर श्रेष्ठ प्राप्त गर्नु भएको हो ।
समारोहमा कमेडियन सीता न्यौपानेले स्याण्डअप कमेडी प्रस्तुत गर्नु भएको छ । रचना रिमाल, बद्री पंगेनी, सुशान्त घिमिरे, सुगम पोख्रेल, अनु चौधरी र हिमाल सागरका साथै भारतीय रियालिटी सो इन्डियन आइडल १२ औं सिजनका विजेता पवनदीप राजन र समूहले विभिन्न गायन प्रस्तुति दिएका छन् ।