हेटौँडामा बालबालिकाको मानसिक क्षमता वृद्धी गराउने ‘स्क्राबल कार्यशाला’ आयोजना

बकैया, मनहरी, राक्सिराङलगायतका पालिकाहरूका माध्यमिक तथा आधारभूत विद्यालयहरू समेतका कक्षा ४ देखि १० का विद्यार्थीहरू सहभागी कार्यक्रमका लागि गत शनिबार पत्रकार सम्मेलन गरी आयोजना मिति, नाम दर्ताका प्रक्रिया, सहभागी विद्यालयबाट शिक्षक तथा विद्यार्थीको आवतजावतका लागि बसको व्यवस्थापन लगायतबारे जानकारी दिइएको थियो ।

‌३ सत्रमा विभाजित कार्यक्रमको समापनमा प्रमुख अतिथि तथा हेटौँडा उपमहानगरपालिकाका उपप्रमुख राजेश बानियाँले कार्यक्रमको प्रस्तुतिहरू अवलोकन गर्दै सहभागीहरूप्रति हौसला र प्रोत्साहन गर्नुभयो । मन्तव्यका क्रममा उहाँले विद्यार्थीको मानसिक क्षमता बढाउने यस्ता कार्यक्रम आगामी दिनमा समेत गर्नुपर्ने र स्थानीय तहले यसका लागि सहयोग गर्ने प्रतिबद्धता व्यक्त गर्नुभयो ।

यसअघि सिमरा नगरपालिकाले ९औँ राष्ट्रिय स्क्राबल प्रतियोगिता कार्यक्रम सम्पन्न गरेको थियो भने श्रीलङ्का, बङ्गलादेश, मलेसिया, भारतलगायतका एसिया महादेशका विभिन्न मुलुकहरूका साथै अमेरिकी विद्यार्थीहरूको समेत सहभागिता रहेका अन्तराष्ट्रिय प्रतियोगिता नेपालमैँ भइरहेका छन् ।

नयाँ खेलका रुपमा विकास भइरहेकोले सहभागीहरूको उत्साहपूर्ण सक्रियता रहनुले स्क्राबलको नेपालमा महत्व बढ्दै गइरहेको आयोजक विद्यालय बालजागृती इङ्लिस सेकेण्डरी स्कुलका प्रिन्सिपल विनोद सुवेदीले जानकारी दिनुभयो । व्यवस्थापनमा कतै पनि समस्या नआउनेगरी पूर्व तयारी गरेकाले पनि कार्यक्रम अपेक्षाकृत सफलता मिलेको उहाँले बताउनुभयो ।

आयोजक विद्यालय बालजागृति इङ्लिस सेकेण्डरी स्कुलले हल भाडा, खाजा, विद्यालयका लागि प्रदान गरिने स्क्राबल बोर्डलगायतका सम्पूर्ण आर्थिक व्यवस्थापन गरेको स्क्राबल कार्यशालाको सुरूवात स्क्राबल गीत गायनबाट सुरू भएको थियो । आयोजक विद्यालयका विद्यार्थीहरूले मङ्गल धुन तथा प्रत्यक्ष गायन समेत गरेका थिए ।