मकवानपुर । शनिबार भानु प्रतिष्ठान नेपाल, बागमति प्रदेश कार्यसमितिले बागमति प्रदेशको राजधानी हेटौँडामा आदिकवि भानुभक्त आचार्यको २११ औँ जन्मजयन्तीमा प्रभातफेरी तथा साहित्यिक कार्यक्रम गरेको छ ।
प्रदेश समितिले शनिबार सोलिड्यारिटी इन्टरनेसनल माविमा साहित्यकार, शिक्षक, बिध्यार्थी, पत्रकार गरी करिब २०० जना जम्मा भएर शुरु भएको प्रभातफेरी बसपार्क, बुद्ध चोक, सिमा चोक हुदै सोलिड्यारिटी इन्टरनेसनल माविमा पुगेर सभामा परिणत भएको थियो ।
बागमति प्रदेशका प्रदेश प्रमुख यादवचन्द्र शर्माले प्रमुख अथितिका रुपमा मन्तव्य राख्नुहुदै भानु जयन्तीलाई प्रदेशहरूमा पनि मनाउन शुरुआत गर्नु ठुलो कुरा भएको र आगामी दिनमा यसलाई जनस्तरसम्म लानुपर्नेमा जोड दिनुभयो । उहाँले देशमा साहित्यको विकास राम्रो भएको तर अझै मलजल गर्न आवश्यक रहेको कुरा बिर्सन नहुनेमा जोड दिनुभयो । उहाँले साहित्य लेखनका समयमा समाजलाई केन्द्रमा राख्नुपर्ने बताउनुभयो ।
कार्यक्रममा सोलिड्यारिटी इन्टरनेसनल माविका विनिता तामाङ, तुलसीमेयर माविका अनुसुया खनाल, बालजागृति माविका सर्जु भण्डारी र आशिका न्यौपाने तथा कवि मञ्जु खरालले भानु सम्बन्धी कविता वाचन गर्नुभएको थियो भने छन्दकवि पुरुषोत्तम आचार्यले रामायणका पाँच श्लोक वाचन गर्नु भएको थियो ।
कार्यक्रममा सर्जक सञ्जाल मकवानपुरका संयोजक निमेष निखिलले भानुभक्त बारे जानकारी दिनुभएको भानु प्रतिष्ठान नेपाल बागमति प्रदेश कार्यसमितिका सहसंयोजक मसान उपासकले जानकारी दिनुभयो ।
कार्यक्रममा रमेशमोहन अधिकारी, श्यामकुमार बानियाँ, देवराज तिवारी, सानु खनाल, डिबि बर्तौला, माधव पोखरेल, अम्बिका कार्की, किशन पौडेल, रजनी पौडेल, भावना सापकोटा, एस. के. निधनलगायतका कवि लेखकहरूको आतिथ्यता रहेको थियो । यस्तै, रधुनाथ खराल, विनोद सुवेदी, रिना आचार्य, बलराम पुडासैनी, शिव चौँलागाई, राजेश थापा गरिब, रुपक कालिराजलगायतको आतिथ्यता रहेको थियो ।
भानु प्रतिष्ठान नेपाल बागमति प्रदेश कार्यसमितिका संयोजक हयग्रीव आचार्यको सभाध्यक्षतामा भएको कार्यक्रमको सहजीकरण मसान उपासकले गर्नुभएको थियो ।