श्रावण १०, बिहीबार
नवसाहित्य अनलाइन । ‘गल्ली संसार’ निबन्ध सङ्ग्रहका कृतिकार रोशन शेरचन हेटौँडामा एक कार्यक्रमबिच उपस्थित हुनुहुनेछ । कवि भूपिनसँग ‘उत्तमशान्ति पुरस्कार २०८०’ प्राप्त कृतिका लेखक शेरचन परिसंवाद कार्यक्रमका क्रममा रहनुहुनेछ ।
साहित्य सङ्गम मकवानपुर तथा सिस्नुपानी नेपालको सभाहलमा आयोजना हुने कार्यक्रममा लेखकद्वय भूपिन र शेरचनबिच उहाँका लेखनका साथसाथै समग्र निबन्ध लेखनको प्रवृत्ति तथा ‘गल्ली संसार’ को सेरोफेरोमा रहेर बहस सञ्चालन हुनेछ ।
शब्दहरूको देश (कविता सङ्ग्रह, वि.सं. २०५३), सरुभक्तहरू (लामो कविता सङ्ग्रह, वि.सं. २०५६), धोबीघाट एक्सप्रेस (निबन्ध सङ्ग्रह, वि.सं. २०७०), मस्तिष्कहरूको मृत्यु(निबन्ध सङ्ग्रह, वि.सं. २०५८), चम्पारन ब्लुज (निबन्ध सङ्ग्रह, वि.सं. २०६८) जस्ता शक्तिशाली पुस्तकहरूको रचना गरी नेपाली साहित्याकाशका लागि समय र बौद्धिकताको लगानी गरिदिने शेरचनले वातावरणीय विज्ञानमा विद्यावारिधि गर्नु भएको छ।
नवीन कृति ‘गल्ली संसार’ ४८ निबन्धहरूको सङ्ग्रह हो । जसमा निबन्धहरूलाई ४ भागमा विभाजन गरी ‘वैचारिकी’ अन्तर्गत १४ वटा, ‘पर्यावरण’ अन्तर्गत ८ वटा, ‘स्मृति–सन्झ्याल’ अन्तर्गत १२ वटा र ‘यात्रा र यात्राहरू’ अन्तर्गत १४ वटा निबन्धहरू समेटिएका छन् । त्यसो त यो पुस्तक पद्मश्री पुरस्कार २०८० का लागि उत्कृष्ट १५ पुस्तकभित्र छनौटमा समेत परेको छ । लेखकमा वन विज्ञान तथा वातावरण विज्ञानको फराकिलो अध्ययनका साथसाथै भ्रमणको अनुभवले कृतिलाई बेग्लै उचाइ दिएको पाठकहरूको धारणा रहेको यस कृतिलाई बुकहिलले प्रकाशन गरेको हो ।
यही श्रावण ११ गते शुक्रबार आयोजना हुने सो कार्यक्रममा वक्ताका रूपमा नेपाल प्रज्ञा प्रतिष्ठान काव्य विभाग सदस्य शान्ति प्रियवन्दना रहनुहुने आयोजक साहित्य सङ्गमका सचिव मनोज पोखरेलले जानकारी गराउनु भएको छ । प्रियबन्दना ‘एक्काइसौँ शताब्दीको जिल खाइरहेको मान्छे’ कविता सङ्ग्रहका कृतिकार समेत हुनुहुन्छ ।
(पुस्तक कभर स्रोतः भुपेन्द्र खड्का)
