- नवसाहित्य
नवसाहित्य डटकम
संवाददाता
नवसाहित्य अनलाइन
यस वर्षको ‘मौलशोभा आमा सम्मान’ विमला राईलाई प्रदान गरिने भएको छ । प्रत्येक वर्ष भाषा, साहित्य, कला, संस्कृति, आर्थिक एवम् राजनीतिक क्षेत्रमा विशेष योगदान पुर्याउने छोराछोरीकी आमालाई रु.५० हजार राशि र ताम्रपत्रसहितको सम्मान कवि, गीतकार तथा साहित्यकार दीपा राई पुनकी आमा विमला राईलाई प्रदान गर्ने निर्णय गरिएको हो ।
नेपाल स्रष्टा समाजका अध्यक्ष एवम् वरिष्ठ साहित्यकार श्री ओम श्रेष्ठ रोदनको संयोजकत्वमा गठित निर्णायक समितिको सिफारिसमा डा. पुरण राईले आफ्नो जन्मदिनको अवसर पारेर विमला राईलाई सो सम्मान प्रदान गर्ने घोषणा गरेका हुन् । अनलाइन अभिलेख प्रा.लि.का संस्थापक डा. राईले भाषा, साहित्य, कला, संस्कृति, आर्थिक र राजनैतिक क्षेत्रमा उल्लेखनीय योगदान पुर्याउने व्यक्तिका आमाको महिमा, गरिमा, त्याग, योगदान र समर्पणको कदर गर्न आफ्नी आमा मौलशोभा राईको नाममा सो सम्मान स्थापना गरेको बताए ।
धरानस्थित होटल पूर्वी स्टारमा आयोजित एक विशेष साहित्यिक कार्यक्रममा डा. राईले स्रष्टा एवम् साहित्यकारले आमरूपमा सम्मान र पुरस्कार पाउनु सामान्य भएको तर साहित्यकार जन्माउने आमालाई सम्मान गर्नु समग्रमा सम्पूर्ण सृष्टिको सम्मान गर्नु हो भन्ने ठहर गर्दै नयाँ परम्पराको थालनी गरेको बताए ।
सम्मानित विमला राईलाई मिति २०८१, कात्तिक २९ गते कवि, गीतकार समाजसेवी एवम् साहित्यकार दीपा राई पुनको जन्मदिनको अवसर पारेर एक समारोहबीच सो सम्मान प्रदान गरिने भएको छ ।
डा. पुरण राईको पाँच कृतिमाथि परिचर्चासमेत भएको सो कार्यक्रममा निर्णायक समितिका सिद्धराज राई, विमला तुम्खेवा र कमल ज्ञवालीका साथै साहित्यकार एवम् सञ्चारकर्मी किवाङहाङ राई, राजेश खनाल, योगेन्द्रकुमार राई, श्रीराम राईलगायतका व्यक्तिहरू उपस्थित थिए ।
#समाचार तथा तस्विर मगोपाल आशुतोष
तपाईँको विचार राख्नुहोस्
शेयर गर्नुहोस्
