- नवसाहित्य
संप्रस पौडेल
समाचार प्रमुखः नवसाहित्य
भाद्र ७, मकवानपुर
नवसाहित्य अनलाइन । नगरस्तरीय शैक्षिक समन्वय समिति, हेटौँडा उपमहानगरपालिकाद्वारा आयोजित सामुदायिक विद्यालयहरूबिचको हाजिरीजवाफ प्रयोगितामा ज्योति माध्यमिक विद्यालयले प्रथम स्थान प्राप्त गरेको छ । यसका साथै विद्यालयले रू. ७ हजार राशिको प्रथम पुरस्कार प्राप्त गरेको छ । यस्तै बालबोध मावि द्वितीय र जनप्रिय मावि तृतीय भई क्रमश: ५ हजार र ३ हजार राशि पुरस्कार प्राप्त गरेका छन् ।
ज्योति माविबाट सलिना सुवेदी, प्रशान्त गोले र समिप घिमिरे पुरस्कृत हुँदा बालबोध माविबाट सृष्टी भुजेल, स्मृति तिमल्सिना र सक्रिना पुडासैनीका साथै जनप्रिय माविबाट एरिना चौलागाईँ, रामकृष्ण आचार्य र कौस्तुभ सुवेदी पुरस्कृत भएका हुन् ।
सहभागी २१ विद्यालयमध्ये पहिलो चरणमा २५ प्रश्नहरू उल्लिखित प्रश्नसेट समाधान गरी छनोट भएका ८ विद्यालय दोस्रो चरणका लागि सहभागी भएका थिए । पहिलो चरणमा बराबरी अङ्क प्राप्त भएपछि प्रगति, राजदेवी र बालज्योति माविको पुन: छनोट चरणमा सहभागी भएका हुन् ।
दोस्रो चरणमा ८ विद्यालयहरूबिचको कडा प्रतिष्पर्धाका क्रममा प्रश्नहरूक क्रमका साथै ‘अडियो राउण्ड’ र ‘भिडियो राउण्ड’ समेत प्रस्तुत गरिएका थिए । कूल २१ विद्यालयका ६३ विद्यार्थी सम्मिलित प्रतियोगितामा पुरस्कार सौजन्य रिडमोर पब्लिकेसन, हाम्रो पत्रपत्रिका सेन्टर, विद्यार्थी पुस्तक पसल र मातृभूमि प्रिन्टिङ सर्भिसेज (छापाखाना) ले गरेको थियो ।
विजयी विद्यालयहरूबिच ३ पटक बराबरी अङ्क प्राप्त भएपछि पुनः प्रश्नहरू सोधिएका थिए । कार्यक्रममा समन्वय समितिका अध्यक्ष भोगेन्द्र लुइँटेलको सभाध्यक्षता र हेटौँडा उपमनपा सामाजिक विकास समिति संयोजक तथा १६ नं. वडा अध्यक्ष रामकृष्ण कोइरालाको प्रमुख आतिथ्य रहेको थियो ।
समन्वय समितिका उपाध्यक्ष प्रतिमा गौतमले स्वागत गर्नु भएको कार्यक्रममा शिक्षा विकास महाशाखा, हेटौँडाका प्रमुख सीताराम कोइरालाले उपनगरपालिकाको दायित्वको यस्ता अतिरिक्त सिकाइका कार्यलाई बढावा गरेकोमा संस्थाप्रति धन्यवाद व्यक्त गर्नुभयो । यस्तै वडाध्यक्ष कोइरालाले कार्यक्रमका लागि शुभकामना व्यक्त गर्दै विद्यार्थीहरूलाई हौसला र ऊर्जा प्रदान गर्ने यस्ता कार्यक्रमहरूमा अझ बढावा गर्दै अघि बढ्नका लागि आग्रह गर्नुभयो ।
अध्यक्ष लुइँटेलले कार्यक्रमलाई सुन्दर र सभ्यरूपमा सम्पन्न गर्न सहयोग गर्ने कार्यक्रम संयोजक, सदस्यहरू, सहभागी विद्यालय तथा विद्यार्थीहरूका साथै कार्यक्रम हल उपलब्ध गराएकोमा जनप्रिय मावि, विभिन्न संस्थाहरूसँग संयोजन गरी पुरस्कार व्यवस्थापन गर्नु भएकोमा आर्थिक व्यवस्थापन योजना विभागका संयोजक विष्णुहरि गौतमलगायत सम्पूर्णलाई धन्यवाद ज्ञापन गर्नुभयो ।
कार्यक्रमाई अतिरिक्त क्रियाकलाप समिति संयोजक बालकुमार श्रेष्ठ, सदस्यद्वय मुकेश मिश्र र पूर्णचन्द्र काफ्लेले सहजीकरण गर्नुभयो । दोस्रो सत्रको कार्यक्रममा जनप्रिय माविका विव्यस अध्यक्ष मोहनप्रसाद बस्ताकोटीको प्रमुख आतिथ्य रहेको थियो ।
जनप्रिय माविमा सञ्चालित कार्यक्रममा शिक्षा विकास महाशाखा, हेटौँडाका प्रतिनिधि, जनप्रिय मावि व्यवस्थापन समिति, अभिभावक, सम्बन्धित प्रतियोगि विद्यालयका शिक्षक तथा विद्यार्थीहरूको उल्लेख्य सहभागिता रहेको थियो ।
