पुस्तक समीक्षा: कुन खेल खेल्ने ?

यस किताबको लेखक ध्रुव घिमिरे हुन् । लेखकको जन्म विक्रम सम्वत् २०२५ मङ्सिर १३ गते कीर्तिपुरमा भएको थियो । उहाँको पिताको नाम माधव घिमिरे हो भने माताको नाम गौरी घिमिरे हो । उहाँ हाल नेपाल बाल साहित्य समाजको अध्यक्षको रूपमा कार्यरत हुनुहुन्छ । उहाँले लेख्नुभएका कृतिहरू मनुको मने, कलेजी थाल, चाडपर्वको रमाइलो आदि हुन् । लेखक लेख्नेदेखि बाहेक पुस्तक पढ्ने र गीत गाउने गर्नुहुन्छ।

यो किताबको आकार लामो र पातलो रहेको छ । यसको गातामा दुईजना बालबालिका पिङमा खेलिरहेका छन् । यो किताबलाई पाठ्यक्रम विकास केन्द्रले २०७४ मा प्रकाशनमा ल्याएको हो । मूल्य ६५ रुपैयाँ रहेको छ ।
यस कथाको मुख्य कथावस्तु खेलकुद र चाडपर्वसँग सम्बन्धित रहेको छ । यस कथामा चाडपर्वमा खेलिने विभिन्न खेलकुदहरू र तिनीहरूको रमाइला पक्षहरू समेटिएका छन् ।

पात्र चरित्र चित्रण
यस कथामा सुशील र सुशीला दुई पात्र रहेका छन् यस कथाको मुख्य पात्र यी दुवै जना हुन् र उनीहरूको स्वभाव दयालु र आज्ञाकारी रहेको छ र परिस्थिति अनुसार पात्रको स्वभाव बुझेर एक अर्काको समस्यामा सहयोग गर्ने खालका यी दुवै पात्र रहेका देखिन्छन् ।

परिवेश
यस कथाले गाउँको वातावरणलाई बुझाउन खोजेको छ गाउँको वातावरण हरियालीले भरिपूर्ण रहेको छ । हावापानी स्वच्छ र सफा रहेको छ अग्लो पहाडको फराकिलो वा सम्म भागमा पिङ हालिएको छ । त्यसै पिङको वरिपरि केटाकेटीहरू रमाइरहेको वातावरणलाई चित्रित गरिएको छ।

मूल भाव
यस पुस्तकले हामीले एकजनाले मात्र खेल्न मिल्ने खेल खेल्नु हुँदैन । सबै मिलेर खेल्दा साथीभाइ बीच खेलको नियम जानिन्छ एक अर्काको पालो कुर्नु पर्छ, खेलमा समझदारी हुनुपर्छ, मिलेर खेलिएको खेलले साथीभाइ बीचको आत्मीय सम्बन्धलाई अझ गाढा बनाउँछ । त्यसैले यस कथाले हामी सबैले मिलेर खेल्नुपर्छ भन्ने सन्देश दिएको छ ।

भाषाशैली
यस कथाभित्र सरल भाषा र शब्दहरूको प्रयोग भएको छ । सोझो हिसाबले बुझिने खालका शब्दहरू रहेका छन् पढ्दै गर्दा सबै शब्दहरूको अर्थ पनि थाहा हुने गर्छ । र यो कथा बुन्ने शैली असाध्यै सरल रहेको छ र बालबालिकाको रुचि र क्षमता अनुसार यो कथा लेखिएको छ ।

शीर्षक सार्थकता
पुस्तकको शीर्षक र यसले भन्न खोजेको कथावस्तु मिलेको छ । किनभने शीर्षकले भनेको जस्तै कथामा एकजनाले मात्र एक्लैखेल नखेलेर सबै एकैचोटी खेल्नुपर्छ । यसरी सँगै खेल्दा साथीभाइ बीच सम्बन्ध राम्रो हुन्छ । भन्ने मुख्य सन्देश दिएको हुनाले यसको शीर्षक मिल्न गएको छ ।

पाठकीय प्रतिक्रिया
मलाई यो कथा असाध्यै राम्रो र रमाइलो लाग्यो । पढ्दा सबै भाषा र शब्दहरू सजिलै बुझ्न सकिने खालको रहेको छ । पृष्ठ सङ्ख्या थोरै भएको हुनाले कथा एकैछिनमा पढेर सकियो । र कथा अझै लामो लेखिदिएको भए हुन्थ्यो भन्ने चाहिँ लाग्यो । र खेलभित्र हुनुपर्ने नियमहरू पनि भनिदिएको भए हुन्थ्यो जस्तो लाग्यो । साथीभाइ बीच मिलेर खेल्नुपर्छ भन्ने कुरा चाहिँ मलाई यो कथाको महत्वपूर्ण सन्देश लाग्यो ।

सुअंश मुक्तान
बालजागृति अङ्ग्रेजी मा.वि.
हेटौँडा–२, वासुदेव मार्ग