बुटवल-११, कालिकानगर, रुपन्देही स्थायी घर भएका देवराज तिवारी हाल हेटौँडा-४, मकवानपुरका स्थायी बासिन्दा हुनुहुन्छ । उहाँ नेपालीमा एम. ए., बी. एड. (एक वर्षे) पछि हेटौँडा स्कुल अफ म्यानेजमेन्ट, हेटौँडा, मकवानपुरमा प्राध्यापन गरिरहनुभएको छ । उहाँ  कविता, गजल, गीत, मुक्तकलगायतका विधामा सक्रिय हुनुहुन्छ । गजल मञ्च मकवानपुरका पूर्व अध्यक्षसमेत हुनुहुन्छ । उहाँका ‘भावहरूका सन्दर्भ’ गजल सङ्रग्रह-२०७०, ‘न्यायको सौन्दर्य’ कविता सङ्रग्रह-२०७६ का साथै विभिन्न पत्रपत्रिकामा फुटकर लेखरचना प्रकाशित छन् । उहाँ मकवानपुर जिल्लास्तरीय खुल्ला कविता प्रतियोगिता प्रथम-२०६५, गजल मञ्च मकवानपुरबाट कृति प्रकाशन सम्मान-२०७०, हेटौँडा स्कुल अफ म्यानेजमेन्टद्वारा उत्कृष्ट शिक्षक सम्मान-२०७१, साहित्य सङ्गम मकवानपुरद्वारा सुभद्रादेवी मदन मुडभरी स्मृति काव्य पुरस्कार-२०७६ लगायतबाट सम्मानित-पुरस्कृत भइसक्नुभएको छ ।

नियतको दुर्गन्ध
 
दुर्गन्ध बोकेर बग्ने
घरछेउकै नालीभन्दा
कयौँ गुना गनाउने हुन्छ
नियतको दुर्गन्ध ।
 
निरन्तर हावामा मिसिई बहने 
ढलको सुवासभन्दा
कहाँ कम छोइने हुन्छ र
रगतका फाल्साहरू बोकेर बहेको हावाको गन्ध 
त्योभन्दा पनि गनाउने हुन्छ 
बदनियतको दुर्गन्ध ।
 
बग्दा पनि बर्सौँसम्म
नसामा रगत 
निस्किरहँदा पनि देशको छातीबाट पसिना
उस्तै छन् बन्धकी परेका कथाहरू
पीडामा नुन छर्किएका व्यथाहरू
तात्त्विक फरक छैन
चलिरहेको मसान वायुको वेगमा
बस एक थान तस्बिरले भित्तो सजिएको मात्रै हो 
नयाँ वर्षको लय समातेर ।
 
जब मिसिन्छ हावामा प्रेत वायु
जब ठोकिन्छ पानीमा तीनपाने रङ
झन् बढी गनाउने हुन्छ
पानीको पाइन
लाग्छ त्योभन्दा पनि खत्तम छ
कब्जियत परेको चेतना स्तर
पक्षाघात भएको
मदहोसी नियतको दुर्गन्ध ।
 
धार लगाइराखेर
खलाँती बिग्रिएको 
कोइला खरानी भएको आरनमा
ढुसी उम्रिएका चेतनाका बिजहरू
घरि घरि मुना पलाउँदै भाँचिँदै
जरा गड्दागड्दै सुकेर माटो
हाँगा र फलको खोजी गर्नु 
ढलभन्दा दुर्गन्धित लाग्छ मलाई
यो नियतैनियतको दुर्गन्ध ।
 
सफा गरेर नाली मात्रै
साफ हुँदो रहेनछ त्यसको प्रवाह
खन्याएर केही ट्याङ्की पानी मात्रै
निर्मल हुँदो रहेनछ त्यसको धार
दागरहित हुँदो रहेनछ छातीको भित्री कलेबर
जबसम्म नदी मूलमा 
फोहोरको विशाल पहाड छ
जस्तो कि भ्रष्टाचारको पहाड
बेथितिको हिमाल छ 
र लाज पनि लजाउने गरी
बहिरहन्छ नियतको दुर्गन्ध बोकेर तातो हावा ।
 
मलाई गर्वले सुनाउन मन छ
नियतलाई नियमले जित्ने समय धेरै टाढा छैन ।
 
देवराज तिवारी बुटवल– ११, हाल : मकवानपुर