पठन संस्कृतिको टेवामा बालजागृतिको पुस्तक समीक्षा

असोज ५/नवसाहित्य ।
बालजागृति इङ्लिस बोर्डिङ स्कुलले हरेक शुक्रबार गर्दै आइरहेको अतिरिक्त क्रियाकलापका विभिन्न गतिविधिहरूमध्ये पठन संस्कृति पनि एक अभिन्न क्रियाकलापका रूपमा रहीआएको छ ।

विद्यालयमा अध्ययनरत कुनै न कुनै तहका विद्यार्थीहरूलाई तहगत क्रमबद्धता अनुसार पुस्तकालयमा बसी पुस्तक अध्ययन गर्ने गराउने क्रियाकलापलाई समेट्दै आइरहेको शिक्षक रजनी पौडेलले बताउनुभयो ।

सिकाइमा सिकारु जागरुक भए मात्रै सिकाइ प्रभावकारी हुने तथा त्यसका लागि शिक्षकले सहजकर्ताको भूमिकामा रहनैपर्ने हुँदा नवीन प्रविधि र विधिको प्रयोगको विकल्प नरहेको प्रधानाध्यापक विनोद सुवेदीले बताउनुभयो । पठन संस्कृतिलाई जोड दिन कक्षागतरूपमा विद्यार्थीहरूबिच पुस्तक चर्चा र परिचर्चाका कार्यक्रमहरूलाई पनि समावेश गर्दै आइरहेको उहाँले जानकारी दिनुभयो ।

प्रधानाध्यापक सुवेदीको सभाध्यक्षता र नियात्राकार रमेश मोहन अधिकारीको प्रमुख अतिथ्यमा सञ्चालित पुस्तक समीक्षा प्रतियोगितामा कक्षा ४ र ५ मा अध्ययनरत ३५ विद्यार्थीहरूको सहभागिता रह्यो ।

पुस्तक परिचर्चा कार्यक्रमका प्रमुख अतिथि अधिकारीले विद्यालयले तल्लो तहदेखि नै पठन संस्कृतिको विकासमा गरेको कार्यको प्रशंसा गर्नुभयो । सहभागी विद्यार्थीहरूले अभिव्यक्त गर्नुभएका पुस्तक माथिका धारणाहरुलाई लिएर आगामी दिनहरुमा साहित्यको क्षेत्रमा उत्कृष्ट पाठकहरूको उत्पादन हुन लागेकोमा खुसी समेत व्यक्त गर्नुभयो । साना कक्षाका विद्यार्थीहरूको अभिव्यक्ति कला माध्यमिकस्तरीय विद्यार्थीहरूभन्दा कम नरहेको कुरा बताउँदै सहभागी विद्यार्थीहरूलाई आगामी दिनमा पनि पुस्तकहरू पढेर पुस्तकमाथिका आफ्ना धारणाहरू प्रस्तुत गरिरहन समेत हौसला दिनुभयो ।

पुस्तक परिचर्चा प्रतियोगितामा प्रत्येक कक्षाका उत्कृष्ट ३ मध्ये कक्षा ४ बाट प्रसिद्धि लामिछाने, क्रिएजन चुनी मगर र युवान शाह तथा कक्षा ५ बाट कोशिका सापकोटा, समृद्धि बर्तौला र आरुसी काफ्ले पुरस्कृत हुनु भएको छ ।