भैरव अर्याल: न भूतो न भविष्यति : -निमेष निखिल

असोज ५/नवसाहित्य ।
८९औँ जन्मजयन्तिको अवसरमा हेटौँडामा एक कार्यक्रम गर्दै भैरव अर्यालको स्मरण गरिएको छ । पुष्पलाल स्मृति पुस्तकालयमा रहेको भैरव अर्यालको प्रतिमामा माल्यार्पण, व्यक्तित्व चर्चा र रचना वाचन गरी अर्यालको स्मरण गरिएको हो ।

मन्तव्यका क्रममा कार्यक्रमका प्रमुख अतिथि निमेष निखिलले भैरव अर्यालको चर्चा गर्दै भन्नुभयो- भैरव अर्याल नेपाली हास्यव्यङ्ग्य लेखनमा अद्वितीय प्रतिभा हुन् । इतिहास, वर्तमान मात्रै नभएर ५० वर्षपछिको भविष्यको समेत कल्पना गरेर लेख्नसक्ने दूर दृष्टियुक्त अर्याललाई हास्यव्यङ्ग्य साहित्यका ‘न भूतो न भविष्यति’ अथक स्रष्टाका रूपमा हामी सम्मान गर्दछौँ ।

कार्यक्रममा चिरञ्जीवि लामिछाने र देवराज तिवारीले व्यङ्ग्य रचनाहरू प्रस्तुत गर्नुभयो ।

महाकाव्यकार मुना धिताल अर्याल तथा साहित्यसेवी मुक्तिगोविन्द वैद्य विशिष्ट अतिथि रहनु भएको कार्यक्रममा साहित्य सङ्गम मकवानपुरका अध्यक्ष डीबी बर्तौला, आँचल साहित्य कला पुञ्ज मकवानपुरकी अध्यक्ष भावना सापकोटा, मुक्तक मञ्चका अध्यक्ष सागर तिमल्सिना, कवि यश लामा, रजनी पौडेललगायतको उपस्थिति रह्यो ।

साहित्य सङ्गम र सिस्नुपानी नेपाल मकवानपुरको संयुक्त आयोजनामा शनिबार सम्पन्न कार्यक्रमलाई साहित्य सङ्गम मकवानपुरका सचिव मनोज पोखरेलले सहजीकरण गर्नुभएको हो ।