प्रभासको ‘साँझमा सेल्फी’ पुस्तक सार्वजनिक

असोज ६, नवसाहित्य ।
कवि तथा उपन्यासकार हेमप्रभासको कविता सङ्ग्रह ‘साँझमा सेल्फी’ लोकार्पण भएको छ । मदन पुरस्कार विजेता डा. नवराज लम्साल, कवि श्रवण मुकारुङ, कलाकार सरोज खनाल, प्रकाशक पुष्पराज पौडेल, कवि हेमप्रभासले उक्त पुस्तक लोकार्पण गर्नु भएको हो ।

शनिबार लोकार्पण कार्यक्रममा कवि नवराज लम्सालले कवितामाथि समीक्षा गर्दै हेमप्रभासलाई कविता कृतिको सफलताको शुभकामना दिँदै सबै कविता उत्कृष्ट रहेको र किताब सबैका लागि उपयोगी हुने बताउनुभयो ।

शिखा बुक्सले प्रकाशन गरेको प्रभासका कविता सङ्ग्रहमाथि कवि श्रवण मुकारुङले सुन्दर कविता लेखनमा सक्रिय प्रभासबाट धेरै आशा गरेको बताउनुभयो ।

मन्तव्यका क्रममा कवि हेम प्रभासले भन्नुभयो- “विगत दुई दशकदेखि कविता साधनारत छु । त्यही साधनाको प्रतिफल नै साँझमा सेल्फी हो ।” उहाँले विगत एक दशकमा लेखिएका बिल्कुलै नयाँ कविताको सङ्ग्रह ‘साँझमा सेल्फी’ रहेको बताउनुभयो ।

राष्ट्रिय नाचघर जमलमा आयोजित कार्यक्रममा कविहरू ठाकुर बेलवासे, सोझो गाउँले, रिमा केसी, शंकर तिवारी आदिबाट कविता वाचन भएको कार्यक्रममा कलाकार सरोज खनालले कविता सङ्ग्रहमा रहेको कवितामाथि नाट्य प्रस्तुति गर्नुभयो ।