२०११ मा होम्लिन वर्मामा जन्मनु भएका कवि तुलसी घिमिरे हाल हेटौँडा–२ मा बसेर साहित्य साधनामा हुनुहुन्छ । उहाँको गीत, कविता, गजललगायतका विधामा सक्रीय हुनुहुन्छ । उहाँ थुप्रै पुरस्कार तथा सम्मानबाट सम्मानित पुरस्कृत भइसक्नुभएको छ । उहाँको फूलका कुरा जुनका कुरा गीत सङ्ग्रह –२०७१ प्रकाशित छ ।
यो सहर हो
यहाँ बोल्नेको कनिका बिक्छ
नबोल्नेको चामल बिक्दैन
अन्त कतै नबिकेको समान
यहाँ बिक्छ
खुन बिक्छ
पसिना बिक्छ
सडेगलेको विचार बिक्छ
अमृतको बोतलमा विष बिक्छ
जिउनुको कहरमा मृत्यु बिक्छ
इमान बिक्छ
धर्म बिक्छ
झुट बिक्छ
जालझेल बिक्छ
यो सहर हो
यहाँ सबै बिक्छ।
जसलाई जे चाहिन्छ
सबै चिज यहींँ पाइन्छ
टाउको बेच्ने यहीँ छ्न्
टुपी बेच्ने पनि यहीँ छ्न्
कोही यहाँ छुर्पी बेच्छन्
बेच्दाबेच्दै बबुरा
आफैलाई बेच्छन्
कोही अकुत कमाउँछ्न्
कोही दिनभरि झिँगा धपाउँछन्
तोरी बेच्ने यहीँ छन्
छोरी बेच्ने यहीँ छ्न
कोही भन्छन्
देखेको पाइन्छ
लेखेको पाइन्न
कोही भन्छन्
लेखेको पाइन्छ
देखेको पाइन्न
तर यो यस्तो सहर हो
जहाँ लेखेको पनि पाइन्छ
देखेको पनि पाइन्छ
साँच्चै !
यो गजबको सहर हो
यहाँ सबै थोक पाइन्छ ।
तुलसी घिमिरे