श्यामकुमार बानियाँको २ म्युजिक भिडियो सार्वजनिक

असोज १४, मकवानपुर ।
साहित्यकार श्यामकुमार बानियाँको २ वटा गीतहरूका म्युजिक भिडियो एक कार्यक्रमबिच सार्वजनिक गरिएको छ ।
०००
“गीत विमोचन कार्यक्रममा उपस्थित तपाईँ सबैजना सभाध्यक्ष हुनुहुन्छ, तपाईँ सबै प्रमुख अतिथि हुनुहुन्छ ।”
सञ्चारकर्मी छवि अनित्यले कार्य्रकमलाई फरक शैलीले सुरूवात गराउनुभयो ।

सङ्गीतकार लाल श्रेष्ठ हेटौँडाबाहिर रहनु भएकाले कार्यक्रममा उहाँको अडियो सन्देश प्रस्तुत गरिएको थियो । उहाँले बानियाँलाई कीर्तिको काम गर्नुभयो भन्ने सन्देश दिँदै उहाँका गीत लेखनले आफूलाई आकर्षित गरेको सन्देश सम्प्रेषण गर्नुभएको थियो ।

नवसाहित्य डट कमद्वारा आयोजित सार्वजनिकीकरण कार्यक्रममा नवसाहित्यका प्रधान सम्पादक निमेष निखिलले श्यामकुमार बानियाँका सङ्घर्षका सुरूवाती दिनदेखि नै आत्मीयता रहेको, छन्दका कविता, बालसाहित्यमा विशेष रूची हुनुका साथै विद्यालय तहका पाठ्यपुस्तक लेखनमा समेत सक्रिय बानियाँले गीत लेखन र गायनमा राम्रै उपस्थिति रहेको बताउनुभयो । साथै उहाँले आफू सङ्गीत, गायनलाई प्रेम गर्ने व्यक्ति भएकाले पनि बानियाँका हृदयस्पर्शी तथा गेय गुणहरूले भरिएको गीत, सङ्गीतकार लालश्रेष्ठको सुन्दर सङ्गीत संयोजन तथा म्युजिक भिडियो छायाङ्कनमा महेन्द्र ओझा तथा कलाकारहरूहरूले उत्कृष्ट अभिनय गर्नुभएको बताउनुभयो । साथै उहाँले नवसाहित्य डट कमका संरक्षकसमेत रहेका बानियाँ तथा म्युजिक भिडियोमा संलग्न सबैलाई शुभकामना तथा बधाई ज्ञापन गर्नुभयो ।

विद्यालय तहमा पढ्दादेखिको चिनजानदेखि कलेज पढ्दाताका बानियाँलाई पत्रकारितामा डोर्‍याउनुहुने पत्रकार भानुभक्त आचार्यले आफ्नो पत्रकारिताका क्रममा भाषा, साहित्य र विषयवस्तुमाथि आवश्यक सुझावका लागि सहकार्य रहीरहेको बताउनुभयो ।

कार्यक्रममा बानियाँको ‘माया भन्नु’ गीतलाई कलाकार उज्ज्वल शर्मा भण्डारीमार्फत् तथा ‘शून्य शून्य’ गीतलाई पत्रकार भानुभक्त आचार्यमार्फत् सार्वजनिक गरिएको हो ।

श्यामकुमार बानियाँद्वारा लिखित ‘आकाशै खुल्यो सुस्तरी’ गीतलाई गायक सागर तिमल्सिनाले गायन गर्नुभयो भने उहाँकै अर्को गीत ‘हिमालमा घाम झुल्क्यो’ लाई गायक अजर फुयाँलले प्रस्तुत गर्नुभयो ।

कार्यक्रममा बाल साहित्य सर्जक अनुसुया खनालले आफू सानै रहेकोले माया बारे नबुझ्ने तर गीतहरू हेरेपछि आफूलाई लागेका भावहरू उल्लेख गर्दै गीतहरूमाथि टिप्पणी राख्नु भयो ।

साथै हेटौँडा उपमहानगरपालिका ४ नम्बर वडाका अध्यक्ष नवीन सिग्देलले गायक बानियाँ आफूले सुरू गरेको काम अनि लेखनप्रति अत्यन्त लगनशील रहनु भएको भन्दै पत्रकारितामा ३/४ वर्ष आफूसँगको विगतको सहकार्यलाई स्मरण गर्नुभयो । मन्तव्यका क्रममा उहाँले भन्नुभयो- श्याम बानियाँ आफैँमा एउटा अभियान हो । साहित्य लेखन, शिक्षण सेवा, पत्रकारिताका साथसाथै गायनमा समेत उल्लेख्य भूमिका खेल्नुभएकोमा आफूलाई गौरव लागेको बताउनुभयो । मञ्चमा एक र व्यवहारमा फरक दृश्य हुने अराजक कविहरू पनि देखिएको हुँदा बानियाँ त्योभन्दा फरक रहेको आफूले पाएको हुँदा मकवानपुरको स्थापित स्रष्टाका रूपमा रहनु भएको मन्तव्य राख्नुभयो ।

साहित्यकार सुवास खनालले आफू विद्यालय तहमा अध्ययन गर्दै गर्दा पत्रिकाको स्तम्भकारका रूपमा चिनेको र सामयिक विषयवस्तु तथा देशप्रेमका गीतहरू लिएर आउँदै भएका बानियाँसँग आउँदा लेखन तथा गीतमा शिक्षण क्षेत्रका पीडा, असहजता, पर्यावरणजस्ता विशिष्टकृत ढङ्गका विषयवस्तु समावेश हुँदा त्यो सिर्जना अझै लामो समयसम्म बाँच्ने सुझाव र अपेक्षा राख्नुभयो । उहाँले प्रेमले भन्दा प्रेममाथि गरिएका कल्पनाहरूको क्षेत्र व्यापक रहेको बताउँदै उहाँले एकपछि अर्को गीतहरू दिँदै आउनु भएकामा मकवानपुरले गर्व गर्न सक्ने व्यक्तित्वका रूपमा बानियाँलाई शुभकामना व्यक्त गर्नुभयो ।

रङ्गकर्मी उज्ज्वल शर्मा भण्डारीले हेटौँडामा कलाकारहरूको खडेरी परेको समयमा कलाकारहरूको अभिनय उत्कृष्ट रहेको तथा लेखन, गायन, भिडियोग्राफी र निर्देशन सुन्दर रहेको बताउँदै बानियाँलाई आगामी समयमा गायनमा अझै अभ्यास गर्दै निरन्तरताका लागि सुझाव दिनुभयो ।

प्याब्सन मकवानपुरका अध्यक्ष विनोद सुवेदीले सहकर्मीका रूपमा बिताएको विगत सम्झँदै बानियाँको गीत लेखन र गायनका साथसाथै शिक्षण मात्रै नभएर शैक्षिक संस्था सञ्चालन गरी शिक्षा क्षेत्रमैँ स्थापित भइसक्नु भएको बताउँदै आगामी यात्राका लागि शुभकामना दिनुभयो ।

सार्वजनिक म्युजिक भिडियोमा कलाकारहरू रिया श्रेष्ठ, अजर फुयाँल, विजयकृष्ण श्रेष्ठ, रजनी अधिकारी, सुबास सजल, प्रसुभा देवकोटा, सुनिता श्रेष्ठ, सङ्गीता श्रेष्ठ, रामु गिरी लगायतले विविध भूमिका निर्वाह गर्नुभएको छ ।

बानियाँले मन्तव्यका क्रममा बानियाँले आफूलाई साहित्य पठनमा जोड गर्नुहुने गुरू स्वर्गीय भोलाप्रसाद पौडेललाई सम्झनुभयो । शिक्षण पेशादेखि साहित्य लेखन अनि गीत रेकर्डसम्म विभिन्न समयमा आफूलाई हौसला र टेवा दिँदै आउनु भएका भन्दै प्याब्सन मकवानपुरका अध्यक्ष विनोद सुवेदी, ४ नं. वडाका वडाध्यक्ष नवीन सिग्देल, सङ्घर्षका दिनहरूमा परिवारका सदस्यले भन्दा बढी सहयोग गर्नुहुने साहित्यकार निमेष निखिल, कलाकार संयोजनका साथै भिडियो निर्देशन र निर्माणका लागि महेन्द्र ओझा, रङ्गकर्मी उज्ज्वल शर्मा भण्डारीप्रति धन्यवाद ज्ञापन गर्नुभयो । उहाँले आफ्ना आउँदा २ गीतलाई भण्डारीले निर्देशन गर्नुहुने कार्यक्रममा जानकारी दिइयो ।

कार्यक्रम सहजकर्ता तथा वक्ताहरूलाई नवसाहित्यमार्फत् सञ्चालक महेन्द्र ओझाले मायाको चिनो प्रदान गर्नुभएको कार्यक्रममा साहित्यकार, गायक, सङ्गीतकार, पत्रकार, कलाकर्मीहरू सहभागिता रह्यो भने रेड पाण्डा होटलमा सो कार्यक्रम आयोजना गरिएको हो ।