चैत्र २, हेटौँडा । नेपाली लेखक सङ्घ मकवानपुरको चौथो जिल्ला अधिवेशन शनिबार सम्पन्न भएको छ । नवौँ साधारण सभा तथा जिल्ला अधिवेशनका क्रममा २ विद्यार्थीहरूलाई पुरस्कृत समेत गरिएको छ ।
अघिल्लो वर्षदेखि प्रदान गर्दै आइरहेको दामोदर-लोकप्रिया स्मृति पुरस्कार हेटौँडा स्कुल अफ म्यानेजमेन्टका विद्यार्थीद्वय प्रतिक ढुङ्गाना र साक्षीकुमारी लाललाई समर्पण गरिएको हो । जनही ११ हजार राशि तथा प्रमाणपत्रको सो पुरस्कार अघिल्लो वर्ष समेत सोही शैक्षिक संस्थाका विद्यार्थीहरूले प्राप्त गरेका थिए ।
सङ्घकी सदस्य विनिता महतले स्वागत गर्नु भएको कार्यक्रममा सदस्य ज्योत्स्ना श्रेष्ठ, गजलकार हरि पौड्याल, देवराज तिवारी, ज्योत्स्ना श्रेष्ठ, सानु खनाल, लगायतले आआफ्ना रचनाहरू वाचन गर्नुभयो ।
प्रमुख अतिथि हयग्रीव आचार्यले कक्षा १२ मा नेपाली विषयमा सर्वोत्कृष्ट नतिजा प्राप्त गर्ने विद्यार्थीलाई दिइने सो पुरस्कारका संस्थापकद्वय विष्णु गौतम तथा उहाँका मामा माधव पोखरेलका साथै पुरस्कृत विद्यार्थी, सम्बन्धित विद्यालय तथा शिक्षकहरूका साथै अभिभावकलाई समेत बधाई ज्ञापन गर्नुभयो । पुरस्कार संस्थापक गौतम र हेटौँडा स्कुल अफ म्यानेजमेन्टका प्रिन्सिपल पुरणबहादुर जोशीलगायतले मन्तव्य राख्नु भएको थियो । मन्तव्यका क्रममा जोशीले लेखकहरूको लेखन निकै शक्तिशाली हुने हुँदा उनीहरूले प्रश्न उब्जाउने मात्रै नभएर समाधानका उपाय समेत लेख्नुपर्नेमा जोड गर्नुभयो ।
साहित्यकारहरूको तर्फबाट सर्जक सञ्जाल मकवानपुरका संयोजक निमेष निखिलले आफ्नो मन्तव्य राख्नुभएको कार्यक्रममा नेपाली लेखक सङ्घ मकवानपुरका अध्यक्ष छवि अनित्यको सभाध्यक्षतामा आयोजित कार्यक्रममा उहाँले अध्यक्षको प्रतिवेदन वाचन गर्नुका साथै यस कार्यकालमा सम्पन्न भएका विविध कार्यक्रमहरूबारे चर्चा गर्नुभयो ।
नेपाली लेखक सङ्घका केन्द्रिय सदस्य हयग्रीव आचार्यको संयोजकत्वमा अप्सरा बस्नेत र हेमन्त ढुङ्गेलसहितको ३ सदस्यीय निर्वाचन समिति गठन गरिएको छ भने सोही समितिले नयाँ कार्यसमिति चयनको प्रक्रिया निर्णय गरिएको छ ।
पल्पसा प्याराडाइजमा आयोजित कार्यक्रमलाई सङ्घका सचिव केशव सुवेदी समर्पणले सहजीकरण गर्नु भएको हो ।