आँचल, मकवानपुरको कविता प्रतियोगितामा १० हजार राशिको प्रथम पुरस्कार

जेठ १२, हेटौँडा । नवसाहित्य अनलाइन । आँचल साहित्य कला पुञ्ज मकवानपुरको आयोजनामा बृहत् साहित्यिक तथा साँस्कृतिक कार्यक्रम २०८२ हुने भएको छ । आँचलको आयोजना तथा हेटौंडा उपमहानगरपालिकाको व्यवस्थापनमा सो कार्यक्रम हुन लागेको हो ।

जेठ १७ गते शनिबार हुने सो कार्यक्रममा कविता प्रतियोगिता हुने आँचलद्वारा जारी सूचनामा उल्लेख गरिएको छ । प्रतियोगितामा ८ कक्षादेखि १२ कक्षासम्म अध्ययनरत विद्यार्थीले मात्र भाग लिन पाउनेछन् भने एक विद्यालयबाट बढीमा दुई विद्यार्थीहरू सहभागी हुन पाउने अध्यक्ष भावना सापकोटाले जानकारी दिनुभयो । बढीमा १५० शब्दसीमा तोकिएको कविता जुनसुकै विषयमा लेखिए पनि मौलिक हुनुपर्ने र कुनै पनि सञ्चार माध्यम वा सामाजिक सञ्जालमा प्रकाशित/प्रसारित हुन नहुने उहाँको बताउनुभयो ।

प्रतियोगीले नेपाली भाषामा टाइप गरी वा हस्तलिखित रूपमा इमेल (sahityaaachal2069@gmail.com) मार्फत् जेठ १४ गते बुधबार साँझ ५ बजेसम्म कविता पठाउनु पर्नेछ । प्रतियोगिताका लागि उत्कृष्ट १० कविता छनोट गरी जेठ १५ गते बिहीबार सार्वजनिक गरिनेछ ।

छनोटपश्चात् प्रतियोगिताका लागि भने कवि स्वयम् उपस्थित भइ कविता वाचन गर्नुपर्नेछ । प्रतियोगितामा प्रथम, द्वितीय, तृतीय हुनेलाई क्रमशः १० हजार, ७ हजार, ४ हजार पुरस्कार राशि तोकिएको छ भने सान्त्वना हुनेलाई १ हजार रुपैयाँ नगदसहित सबैलाई प्रमाणपत्र प्रदान गरिनेछ ।