प्रज्ञा प्रतिष्ठानद्वारा ‘राष्ट्रिय कविता महोत्सव’ २०८२ का लागि कविता आह्वान

१३ जेठ । नवसाहित्य अनलाइन । नेपाल प्रज्ञा प्रतिष्ठानको ६८औँ वार्षिकोत्सवका उपलक्ष्यमा राष्ट्रिय कविता महोत्सवका लागि कविता आह्वान गरिएको छ । २०८२ असार ९ गते प्रज्ञाप्रतिष्ठानद्वारा आयोजना हुने राष्ट्रिय कविता महोत्सवका लागि जेठ २० गतेसम्म कविता उपलब्ध गराइसक्नुपर्ने सूचनामा उल्लेख गरिएको छ ।

प्रतिष्ठानले कविता उपलब्ध गराउनका लागि आफैँ उपस्थित भई वा इमेल (kavitamahotsav082@gmail.com) गर्न सकिने नेपाली कविहरूका लागि अनुरोध गरेको छ । समावेशी सहभागितामूलक र बहुभाषी गरिने हुनाले कविता नेपालका सबै भाषा/मातृभाषामा लेखेर सहभागिता जनाउन सकिने तथा मातृभाषामा पठाइएका कविता अनिवार्य रूपमा अनुवादसहित पठाउनुपर्ने जानकारी गराइएको छ ।

प्राप्त कविताहरू मध्येबाट उत्कृष्ट १० कवितालाई रु. ४० हजार सहित कदर-पत्र प्रदान गरिने छ भने कविता मौलिक हुनुका साथै महोत्सव सम्पन्न नभएसम्म कुनै पनि विद्युतीय वा छापा माध्यमबाट प्रसारित र प्रकाशित नभएको हुनुपर्ने छ । म्याद नाघी आएका तथा तोकिएको मापदण्डविपरीत रहेका कवितालावई महोत्सवको मूल्याङ्कन प्रक्रियामा समावेश नगरिने सूचनामा उल्लेख गरिएको छ ।

सहभागी कविहरूले आफ्नो ठेगाना खुलाई हालसालै खिचेको एकप्रति पासपोर्ट साइजको फोटो र सम्पर्क फोन/मोबाइल नम्बर अनिवार्य रूपमा स्पष्ट लेखी पठाउनुपर्नेछ ।