नाम: विष्णु पादुका जन्मस्थान: कास्कीकोट ,कास्की हाल बसोबास: कोहलपुर बाँके
पेशा: शिक्षण ( २५वर्ष अनुभव), डोल्पा
पुस्तक प्रकाशन:
१) साइनो -(साइनो कविता संग्रह )२०७६
२) बिन्दुको वृत्त कविता संग्रह२०७८
पुरस्कार/सम्मान: बलराम स्मृति वाङ्मय प्रतिष्ठान ,चितवन २०७९ उत्कृष्ट कविता संग्रह
-कथा, कविता ,निबन्ध फुटकर प्रकाशन,
प्रकाशोन्मुख कृति – उपन्यास
छेस्का, सुसेली झैँ ‘साइनो’ पनि कविता विधाको लघु कविताअन्तर्गत पर्दछ । त्यहीक्रममा उहाँले साइनो कविता सङ्ग्रह प्रकाशन गर्नुभएको छ भने उहाँका बिन्दुको वृत्त कविता संग्रह गरी हालसम्म कूल २ कृति रहेका छन् ।
साच्चै तपाईं बाध्यतामा हुनुहुन्छ भने
ठिकै छ
नत्र चैनकै अपेक्षा बोकेर
भो तपाईं यता न आउनु
लोभी आँखामा सुन्दरता भर्न मन छ भने
ठिकै छ
हाजिर छन् सेताम्मे हिमाल
हरिया वनजंगल
र कोखमा पत्थर बोकेका काला पहाड पनि
बाटाभरी तपाईं हामी मात्रै हिड्न पाए त
ठिकै छ
धेरै जसो बाटो नै मिचेर
कहिले धुले पहिरो कहिले हिले पहिरो हिडिरहेको देख्दा
नदीले डुबाएको बाटो नदेख्दा
दिक्क लाग्दै धिक्कार्नु छ भने
भो तपाईं यता न आउनु
चुटिएका झोलुङ्गे पुल
लठ्ठो र घिर्नी खिइएका तुइन
टुइटर, फेसबुक र युटुबमा हेर्दै
लिन सकिन्छ मनोरञ्जन
यथार्थसँग
आत्मसात गर्न चाहनुहुन्छ भने त ठिकै छ
नत्र
कहरहरुको शहर हो कर्णाली
भारी र भरियाको सुगन्ध समेत जोडिएको हुन्छ
तपाईंले खानुपर्ने हरेक गासमा
उकालो ओरालोमा बगेका ती पसिनाको
तिर्न सक्नु हुन्छ मोल भने त ठिकै छ
नत्र महंगीको आक्षेप छोड्न मात्र आउने भए
भो तपाईं यता न आउनु
घाम पूर्वदेखी झुल्किन्छ
उज्यालो भनेको विकास पनि हो भन्छन्
हिउँ टाउकोमा सजाएका अलिकति अग्ला
डाँडाहरुको निरन्तरताको गीत सुन्ने भए
बस्ती पिच्छेको नौलो भाषा अनि रितिरिवाज देख्ने भए
कस्तुरी नाउरको वन
डाँफे र हिमाली चरीको आकाश
सल्ला र धुपीको सुगन्धित बतास लिने भए त
ठिकै छ
अलिकति बेथिति
अलिकति अनियमितता
अलिकति अभाव
अलिकति दुखलाई
कर्णालीकै पहिचान बनाउने चाहना लिएर
भो तपाईं यता न आउनु
आँसु र पसिनाले
साना ठुला ताल भरिएका छन् यत्रतत्र
स्पर्श गरेर आफ्नै अनुभूति मिसाएर अझ निर्मल पार्न
आउनु हुन्छ भने त ठिकै छ
आफैमा स्वच्छता बोकेका जलराशीलाई प्रदुषण मात्र थप्ने भए
भो तपाईं न आउनु यता
हावा अलिक बेसि नै चल्छ
निभे पनि अँध्यारोमा बत्ती त बल्छ बल्छ
समयलाई कसैले रोकेन पनि
कसैले दगुराएन पनि
तिता हुन्छन् यथार्थहरू
लगर जस्तै तिते फापरका
चाउचाउ बिस्कुट सभ्यता उतै छोडेर
आउन सक्नु हुन्छ भने त ठिकै छ
आफ्नो बिज्ञापन गर्न र महत्वाकांक्षा थप्न
आलोचनाको एक अर्को गौडो मात्र चढ्न हो भने
भो तपाईं न आउनु यता
यात्रालाई एक अनुष्ठान ठान्नु हुन्छ भने ठिकै छ
दुख र जोखिमलाई प्रसाद ठान्नु हुन्छ भने ठिकै छ
हामी तिमी सम्बोधन गर्छौं
पवित्र र आत्मिय जान्नु हुन्छ भने ठिकै छ
नत्र,
यसै कुरामा आलोचनाको बिख पोख्नु हुन्छ
तपाईंको तामझामको शहर पुगेर भने
भो तपाईं न आउनु यता ।
विष्णु पादुका