थानकोट, काठमाडौँका मौन आवाज साहित्य साधना एवम् सम्पादन कर्ममा सक्रिय हुनुहुन्छ । उहाँको ‘यो शताब्दीमा म पनि छु’ (२०७१ -कविता सङ्ग्रह) प्रकाशित छ । चिहान मासिक, सुन्दर गोरेटो, प्रतिबिम्ब मासिक एवम् बलामी आवाजमा उहाँ सम्पादक एवम् प्रधान सम्पादकको भूमिकामा रहनुभएको छ । शोणितपुर मिडिया प्रा. लि. को अध्यक्ष रहनुभएका उहाँले पछिल्लो समय कविताका माध्यमबाट सशक्त हस्तक्षेप गरिरहनुभएको छ । राजनीतिमा भन्दा धेरै साहित्यमा राजनीति हुन्छ भन्ने उहाँ कवितामार्फत् ‘हामी हिँडिरहेका छौँ, तर कतै पुगिरहेका छैनौँ’ भन्नुहुन्छ त कहिले ‘क्रान्तिलाई फगत राजनीतिक विषय ठान्नु गलत कुरा हो’ भन्नुहुन्छ ।
खबर आएको छैन
लेखेर पठाएको छु एउटा चिठी !
सम्बोधनमा छन्
हृदयभरिका जम्मै भावनाहरू ।
हुरी चलिरहेको छ
भीषण बर्सात भइरहेको छ ।
पहिरो गइरहेको छ
बाढी आइरहेको छ ।
पृथ्वी नै पल्टेला जस्तो
उत्पात भइरहेको छ ।
खामभित्र पठाएको छु मुटु !
पुग्यो पुगेन ठेगानामा
खबर आएको छैन !
व्याकुल साँझ
म एक्लै छु
र टाढा
जून एक्लै छ आकाशमा ।
साँझपख
कसैलाई पर्खिरहेको
एउटा प्रतीक्षारत छाया छ
नैराश्यता छ
र मौनता छ ।
साँझमा
जून एक्लै छ
म एक्लै छु ।
एउटा क्रमिक ध्वनि
जो अटुट
प्रतिध्वनित भैइरहेछ यतै कतैतिर ।
साँझमा
एउटा अटुट धुन जो गुन्जिरहेछ / निरन्तर-
म सुन्दै छु
ती नबजेका धुनहरू – जो बज्नेबाला छन्
आउनेबाला छ कोही
पर्खिरहेछु !
टुक्रा / टुक्रा हुँदै छ उज्यालो
बढ्दै छ अँध्यारो ।
म अझै एक्लै छु
र टाढा अझै एक्लै छ जून !
साँझमा
म एक्लै छु
र कोही आउनेबाला छ
पर्खिरहेको छु !
(२०७१ सालमा प्रकाशित ’यो शताब्दीमा म पनि छु’ कविता सङ्ग्रहबाट )
पानी
जल्लादले मान्छे मारिसकेपछि
आफ्नो रक्ताम्य हात पानीले धोयो
जल्लादको हात सफा भयो
तर
पानी रक्ताम्य भयो ।
रक्ताम्य पानी
खोला / नदी र खोल्सामा बग्यो
छाँगा / छहरा र झरनामा बग्यो
बग्यो – समयको गतिशीलतामा
युगको अनन्ततामा ।
बग्दै / बग्दै एक दिन त्यो रक्ताम्य पानी
एउटा भिक्षुको अन्जुलीमा आइपुग्यो
मन्दिरमा जल चढाइरहेको भक्तको हातमा आइपुग्यो
पितृलाई तर्पण दिइरहेको
एउटा अभागी छोराको हातमा आइपुग्यो ।
यसरी
जल्लादले हत्या गरेको मान्छेको रगत
पानीमा मिसिएर जल्लादकै मुखमा आइपुग्यो !