पाल्पामा जन्मेका जनक कार्की हाल तानसेनमा बसोबास गर्छन् । प्रमाणपत्र तहसम्म अध्ययन गरेका उनी पेसाले रेडियोकर्मी हुन् । साहित्यिक आबद्धताका दृष्टिले उनी पाल्पा स्वास्थ्य तथा साहित्य प्रतिष्ठानका आजीवन सदस्य तथा विश्व साहित्य सञ्जालका उपाध्यक्ष हुन् । पुस्तक प्रकाशनतर्फ उनको संयुक्त कविता सङ्ग्रह `अनुहारको भिड प्रकाशित छ । बाह्रखरी उत्कृष्ट कथा २०७९ र बौद्ध विश्वविद्यालय उत्कृष्ट बौद्ध कथा उनले पाएका केही पुरस्कार / सम्मान हुन् ।
हजुर आउने भनेको सुनेपछि
मेरो झ्यालबाट देखिने चन्द्रमालाई छेकेको
बाँसघारीलाई फाँडेको छु
बादललाई खेत रोप्न पठाएको छु
लामखुट्टेलाई मामाघर पुर्याएर आएको छु ।
हजुर आउने भनेको सुनेपछि
आकाशको प्लेटमा काजुजस्ता तारा पस्केको छु
जुनको किरण प्यालामा खनाएर राखेको छु
फूलभित्रको परागमा बसेको अत्तर चोरेर
घरभरि छर्केको छु ।
हजुर आउने भनेको सुनेपछि
धेरै दिनपछि बेरोजगार कुचोले काम पाएको छ
रेस्टुरेन्टमा खाना खाने एउटा ग्राहक घटेको छ
अल्छी ग्यास चुलो भरभराउन थालेको छ ।
हजुर आउने भनेको सुनेपछि
ओथारो पारेर बसेका फोहोर कपडाले पानीको मुख देखे
न्युड सिरानी र सिरकले कपडा लगाउन पाए
पक्षाघात भइसकेको तन्ना फिजियोथेरापीले तनक्क तन्किन पायो ।
हजुर आउने प्रतीक्षामा
कति बेला डोर बेल बज्ला भनेर
व्यग्र प्रतीक्षामा थिएँ
अचानक फोन रिङ आयो
भन्नुभयो,`ठेगाना नजिक आइपुगेको थिएँ
साउने झरीले पहिरोमा फसियो ।´
हजुरको स्वागतमा मुस्कान पस्केको थिएँ
खेर गयो !
जनक कार्की
तानसेन, पाल्पा