हेटौंडा, श्रावण २६
जनप्रिय मा.वि., हेटौंडा १६ मा विद्यार्थीहरूका लागि एक हप्ते विद्यार्थीकेन्द्रित सहक्रियाकलापहरू सञ्चालन गरिएको छ ।
शुक्रबारको कार्यशालामा नवसर्जक नेपालका संरक्षक दीपक गौतमले कविताको प्रशिक्षण गराउनुभयो । करीब ५० जना विद्यार्थीहरूलाई गराइएको यस प्रशिक्षणमार्फत् विद्यार्थीहरूले कविता रचना गर्ने प्रारम्भिक ज्ञान प्राप्त गरेका छन् । जसमा कविता लेखनका शिल्पहरूबारे चर्चा गरिएको थियो ।
कार्यक्रमपश्चात् उहाँले भन्नुभयो- जनप्रिय माविले विदाको समयको सदुपयोग गर्दै विद्यार्थीको सिर्जनात्मक सीप विकासका लागि आयोजना गरेको कार्यशाला अत्यन्तै प्रभावकारी छ । कविता लेखन कार्यशालाबाट विद्यार्थीले लोक लयअन्तर्गत ६ प्रकारका छन्द र मुक्त लय (गद्य) कविता लेखनको अभ्यास गरेका छन् । यस किसिमको अभ्यासले बालबालिकालाई कविताको सैद्धान्तिक ज्ञान हासिल हुनुका साथै कविता लेख्न सक्षम बन्ने आशा गर्न सकिन्छ । अन्य सामुदायिक तथा संस्थागत विद्यालयले समेत यस किसिमको रचनात्मक गतिविधि सञ्चालन गर्नु आवश्यक छ ।
भाइबहिनीहरूले सक्रियापूर्वक कथा, कविता, मुक्तक, गजल लेखन तथा गायनका साथै सञ्चालित हरेक विधामा सक्रिय सहभागिता जनाएको अंग्रेजी माध्यम संयोजक रविन श्रेष्ठले बताउनुभयो ।
गत २१ गतेदेखि सुरु भएको सो कार्यशालामा योग अभ्यास, खेलकूद तथा साहित्यिक कार्यशालाबाट सुरु भएको, २२ गतेदेखि २५ गतेसम्म ३ दिने उद्घोषण तालिम सञ्चालन भई २६ र २७ मा साहित्यिक लगायतका कार्यशाला गरिएको कार्यक्रम संयोजक संप्रस पौडेलले बताउनुभयो ।
आइतबार नवोदय शिशु सदनका प्रशिक्षकहरूबाट जनप्रिय माविको क्यालेण्डरमा उल्लेखित Book Creation camp का लागि सहजीकरणस्वरूप हस्तलिखत किताब निर्माण कार्यशाला गराइने र त्यसबीचमा विद्यार्थीहरूले आफ्ना साहित्य सिर्जना संकलन गरी पुस्तकाकार दिइने र शुक्रबार समापन कार्यक्रम आयोजना गरिने जनप्रिय मिडिया विभाग संयोजक सुनिल गौतमले बताउनुभयो ।
प्रशिक्षकहरू सुनिल गौतमबाट नेपाली भाषामा कथा लेखन, विश्वनाथ सञ्जेलबाट मुक्तक तथा गजल कार्यशाला सञ्चालन गरियो भने अंग्रेजी भाषाको कथा लेखन प्रशिक्षकहरू रविन श्रेष्ठ र नीरबहादुर खड्काले सञ्चालन गराउनुभयो । यस प्रशिक्षणमा कथा लेखनका सिद्धान्त, कौशल, उद्देश्य तथा विषयवस्तुबारे चर्चा गरिएको थियो । कथा लेखनमा रूचीका साथ सहभागिता रह्यो ।
साथै प्रशिक्षक सुजन राईबाट विद्यार्थीहरूलाई चित्रकलाको प्रशिक्षण गरियो । सहभागी करीब ५० जना विद्यार्थीमध्ये रूची भएका केही विद्यार्थीहरू हरेक शनिबार आयोजना हुने Plein Art कार्यक्रममा सहभागी हुनेछन् । विद्यार्थीहरू भोलीबाट नै यस कार्यक्रममा निरन्तर सहभागी हुनेछन् ।
पत्रकार तथा उद्घोषण प्रशिक्षक रुपक कालिराजद्वारा ४५ जना विद्यार्थीहरू ३ दिनको उद्घोषणकलाद्वारा प्रशिक्षित गरिएको थियो । सहभागीमध्ये कक्षा ८ की सारा गिरीले विगतमा माइक्रोफोन समाउनासाथ लाज र डर लाग्ने गरेकोमा अब ठूलो समूहका अगाडी निर्धक्कसँग बोल्न सक्ने भएको बताउनुभयो ।
यस्तै पत्रकार तथा पठन संस्कृति अभियानमा लागि पर्नु भएका प्रशिक्षक छवि अनित्यले वादविवाद तथा वक्तृत्वकलासम्बन्धि कार्यशालाको सहजीकरण गर्नुभयो ।
जनप्रिय माविका खेलकूद प्रशिक्षक शिवहरि राईले सटपुट, ज्याभलिन थ्रो, भलिबल, फूटबललगायतका खेलकूदका क्रियाकलापहरू सहजीकरण गर्नुभयो । करीब ३५ जनाको समूहमा सञ्चालित नृत्य प्रशिक्षण अम्बर गुरूङले सञ्चालन गर्नुभयो ।
जनप्रिय माविका शिक्षक युक्तलाल विश्वकर्मा र घनश्याम ढकालले विद्यार्थीको एक समूहलाई योगका महत्व दर्शाउँदै विभिन्न आसनहरूबारे अभ्यस्त बनाउनु भयो । सहभागीमध्ये कक्षा ५ की स्वस्तिका लामिछानेले योगका विभिन्न आसन तथा चरणहरूबारे सिकाइ भएको र योगबाट शरीरका साथै दिमागलाई पनि फाइदा पुग्ने बताउनु भयो । उहाँले ध्यान मुद्रा, गायत्री मन्त्र, महामृत्युन्जय मन्त्रका साथै कपालभाँती, अनुलोम विलोम, सूर्य नमस्कारका बाह्र चरणहरू प्रयोग गरिएको बताउनु भयो ।
करीब १५० विद्यार्थीहरू दैनिक रूपमा विभिन्न कार्यशालामा सहभागी सो कार्यक्रममा विद्यालय व्यवस्थापन समिति सदस्यहरू कृष्णप्रसाद पनेरू र रमेश ढकाललगायतले अनुगमन गरी यस कार्यक्रमको प्रतिफल सकारात्मक आउनेमा विश्वस्त रहेको र विद्यार्थीको आन्तरिक क्षमता अभिवृद्धिका साथसाथै नियमित पढाइलाई समेत यसले सघाउ पुग्ने बताउनु भयो ।
आफ्नै सुविधासम्पन्न मिडिया कक्ष रहेको जनप्रिय माविले विद्यार्थीहरूलाई रेडियो कार्यक्रमसम्बन्धी विभिन्न अवसरहरू प्रदान गर्दै आइरहेको र हाल सञ्चालित उद्घोषण कार्यले त्यसलाई सहज बनाउनुका साथै सञ्चालित सम्पूर्ण सहक्रियाकलाप कार्यक्रमले विद्यार्थीहरूलाई विद्यालय र शिक्षकसँगको सिकाइलाई सहयोग पुग्ने जनप्रिय अतिरिक्त तथा साँस्कृतिक विभाग संयोजक युक्तलाल विश्वकर्माले जानकारी दिनुभयो ।
यस विद्यालयमा साहित्य तथा बौद्धिक, सञ्चार, कला तथा साँस्कृतिक, खेलकूद, अनुशासन, भ्रमण, बागबानी, अनुसन्धान लगायतका १२ विधाको समूह बनाई सोअनुसार समितिमार्फत् विभिन्न कार्यक्रमहरू सञ्चालन हुँदै आइरहेको छ ।
विद्यालयका प्रधानाध्यापक भुपेन्द्र चौलागाईँले वर्षे विदाको समयमा पनि अत्यन्त सक्रियतापूर्वक विद्यार्थीहरूको सहभागिता रहेको र यसबाट उत्कृष्ट प्रतिफल प्राप्त हुने विश्वास लिएको बताउँदै कार्यक्रमलाई सफल तुल्याउन हर तरहले सक्रिय रहेका सहभागी विद्यार्थीहरू, प्रशिक्षकहरू र व्यवस्थापन तथा संयोजनमा प्रत्यक्ष खटिएर सहयोग पुर्याइरहनुभएका सम्पूर्ण शिक्षक तथा कर्मचारीहरूका कारण कार्यक्रम सफल भएको बताउनु भयो । सहभागीहरू सबैलाई प्रमाणपत्र उपलब्ध गराइने समेत उहाँले जानकारी दिनुभयो ।