भाद्र १२, मकवानपुर ।
पुष्पलाल स्मृति पुस्तकालय हेटौँडाले यही भाद्र १५ गते शुक्रबार ११ बजे १६ औं पुस्तकालय दिवसको अवसरमा पुष्पलाल स्मृति पुस्तकालयको आयोजनामा ‘पठन संस्कृति आजको आवश्यकता’ विषयक विद्यालयस्तरीय वक्तृत्वकला प्रतियोगिता गर्ने भएको छ ।
विद्यालयका प्र.अ. तथा अतिरिक्त क्रियाकलाप संयोजकलाई सम्बोधन गरी लेखिएको पत्रमा प्रत्येक विद्यालयबाट ३ जना विद्यार्थी उपस्थित गराउन अनुरोध गरिएको छ । प्रतियोगितामा प्रथम, द्वितीय, तृतीय र सान्त्वना पुरस्कार राशी क्रमशः २ हजार, १ हजार ५ सय, १ हजार र ५ सय रुपैयाँ राखिएको छ । पुरस्कार राशीका साथमा प्रमाणपत्र र पुस्तकहरू समेत उपहार प्राप्त हुने साहित्य संगम मकवानपुरकी अध्यक्ष अनिता न्यौपानेले बताउनु भयो ।
भाद्र १५ गते पुष्पलाल स्मृति पुस्तकालय, हेटौँडा-५ मा बिहान ११ बजे आयोजना हुने यस प्रतियोगितामा विद्यालयका जुनसुकै तह (कक्षा १२ सम्म) का विद्यार्थीहरू सहभागी हुन सकिने र थप जानकारीका लागि ९८४५२९००७९ मोबाइल नम्बरमा सम्पर्क गर्न सकिने संगमका सचिव डिबी बर्तौलाले बताउनुभयो ।
पुष्पलाल पुस्तकालय हेटौँडा ५ मा रहेको पुष्पलाल स्मृति पार्क (बालकुमारी राजयोग सेवा केन्द्रद्वारा सञ्चालित) मा रहेको छ भने साहित्य संगम मकवानपुर र हेटौँडा उपमहानगरपालिकाको साझेदारीमा सञ्चालन हुँदै आएको छ ।