मकवानपुर । सर्जक सञ्जाल मकवानपुरको आयोजनामा भ्रष्टाचारविरूद्ध सप्ताहव्यापि रचना वाचन कार्यक्रम सम्पन्न गरेको छ ।
हेटौँडाको बुद्ध चोकबाट शुरु भएको कार्यक्रम हेटौँडा–४ शीतलमहल चोक, हेटौँडा–२ संगम चोक, हेटौँडा–६ चौघडा चोक, हेटौँडा–१६ चिसापानी, हेटौँडा–८ कमानेमा दैनिक कार्यक्रम गर्दै समापन कार्यक्रम पुनः बुद्ध चोकमा सम्पन्न गरिएको हो ।
आज आयोजित कार्यक्रममा २८ सर्जकहरूको रचना वाचन भयो । रोशनी चौलागाईँ, जनार्दन खनाल, दीपक गौतम, संप्रस पौडेल, देवराज तिवारी, यश लामा, सानु खनाल, शम्भुप्रसाद बाँसकोटा, सुवास खनाल, गोविन्द दुलाल, राजकुमार लामिछाने, केशव समर्पण, शोभा थापा, सुदीप गिरी, एस. के. निधन, छवि अनित्य, हयग्रीव आचार्य, किसन पौडेल, राजकुमार चौधरी, सञ्जीत श्रेष्ठ आदिले रचना वाचन गर्नुभयो ।
सर्जक सञ्जाल मकवानपुरद्वारा आयोजित सप्ताहव्यापि कार्यक्रम मकवानपुरका सबै साहित्यिक संस्थाका सहभागितामा रहेको भन्दै संयोजक निमेष निखिलले सडकमा रचना वाचन गर्दै गर्दा महिनामा एउटा कार्यक्रम सडकमा गर्दा आम मानिससँग जोडिन पाइने हुँदा त्यसतर्फ ध्यान केन्द्रित भएको बताउनु भयो ।
कार्यक्रममा स्थानीय, यात्रुहरू, शिक्षक, विद्यार्थी तथा मिडियाकर्मी लगायत स्रोता दर्शकहरूको उल्लेख्य सहभागिता रहेको थियो ।
भ्रष्टाचारका विभिन्न घटनाहरू सार्वजनिक भैरहेका बेला कारबाहीका लागि सर्जकहरूले देशव्यापी रूपमा दबाब सिर्जना गर्ने क्रम बढ्दै जाँदा ७ दिने अभियानका रूपमा आज समापन भएता पनि खबरदारी गर्ने काम कहिल्यै नरोकिने आयोजकले बताएको छ ।
अन्तिम दिनको कार्यक्रम मीनप्रसाद लामिछानेले सहजीकरण गर्नुभएको हो ।
#भ्रष्टाचारविरूद्ध सचेतना #रचना वाचन #सर्जक सञ्जाल मकवानपुर