भाद्र २३, मकवानपुर ।
मकवानपुरमा रहेको सक्रिय साहित्यिक संस्थामध्ये एक जेठो संस्था साहित्य संगम मकवानपुरको १६औं अधिवेशन सम्पन्न भएको छ ।
शनिबार हेटौँडा क्याम्पसमा सम्पन्न अधिवेशनपश्चात् नयाँ समिति चयन भएको छ ।
संगमका अघिल्ला कार्यसमितिमा सचिवका रूपमा रहेका डिबी बर्तौला ९७ मतसहित अध्यक्षमा विजयी हुँदै गर्दा अर्का उम्मेदवार पुरूषोत्तम आचार्यले ८१ मत प्राप्त गर्नु भएको छ ।
यस्तै १२१ मतसहित उपाध्यक्षमा सानु खनाल दोहोरिनु भएको छ । उहाँका प्रतिष्पर्धी एस के निधनले ५६ मत प्राप्त गर्नुभयो ।
६७ मत प्राप्त गर्नु भएका यश लामाका प्रतिष्पर्धी तथा अघिल्लो कार्यसमितिका कोषाध्यक्ष मनोज पोखरेलले ११० मतसहित सचिव पदमा विजय हुनु भएको छ । कोषाध्यक्षमा मेनु तिमल्सिना र सहसचिवमा भवानी तिमल्सिना निर्विरोध चयन हुनु भएको छ भने सदस्यहरूमा १२४ मतसहित रजनी पौडेल, ११८ मतसहित स्वस्तिका बानियाँ, ९९ मतसहित कृतिका लौडारी र ८३ मतसहित कुबेर पराजुली चयन हुनु भएको छ । अन्य उम्मेदवारहरूमा मीनप्रसाद लामिछाने, बैकुण्ठ लामिछाने, सिएम रिमाल रहनु भएको थियो ।
संगमका कूल २४४ सदस्यमध्ये १८२ जना (७४.८९%) ले मताधिकार प्रयोग गरेका थिए भने ३ मत बदर भएको थियो ।
संगममा पूर्व अध्यक्ष अनिता न्यौपाने, वर्तमान अध्यक्ष डिबी बर्तौला र पुरूषोत्तम आचार्य गरी ३ जना अध्यक्षका लागि उम्मेदवारी रहेकोमा न्यौपानेले उम्मेदवारी फिर्ता लिनु भएको हो । आचार्यले अन्तिम समयसम्म पनि सहमतिको प्रयासका लागि सहजिकरण गर्नुहुने सबैप्रति धन्यवादका साथ विजयी सबैलाई शुभकामना दिनुभयो । भने पूर्व अध्यक्ष न्यौपानेले कामको मूल्याङ्कन शुभचिन्तक र सदस्यहरूले नै गर्नुहुनका लागि अनुरोध गर्नुभयो ।
संगमका नयाँ नेतृत्व प्राप्त गरेपछि अध्यक्ष बर्तौला, उपाध्यक्ष खनाल र सचिव पोखरेलले आगामी कार्यकाल सबैजनासँग हातेमालो गर्दै साहित्यिक गतिविधिमा सक्रिय रहने बताउनु भएको थियो ।
निर्वाचन मण्डलमा तुल्सी घिमिरे, निमेष निखिल, सुवास खनाल र अधिवक्ता ऋषि केबी रहनु भएको थियो ।
यही अधिवेशनका क्रममा संगमले रचना वाचन गरी सुरू गरेको कार्यक्रममा संस्थागततर्फ प्याब्सन मकवानपुर, नवोदय शिशु सदन, नेपाल हृदयरोग निवारण केन्द्रका साथै साहित्यसेवी तथा बालजागृति अंग्रेजी बोर्डिङ् स्कुलका प्रिन्सिपल विनोद सुवेदी, दाता सुदीप शिवाकोटी र सूचना सम्प्रेषणका लागि प्रदेश सञ्चार डटकमका सम्पादक केशव सुवेदी समर्पण सम्मानित हुनुभयो ।
२०४४ सालमा स्थापित संगम र २०५५ मा स्थापित सिस्नुपानी मकवानपुरलाई साहित्यसेवी तथा हास्यव्यङ्ग्यकार आरसी रिजालले जग्गा उपलब्ध गराउनु भएकोमा हेटौँडा भैरवरोडस्थित संयुक्त भवनमा विभिन्न साहित्यिक क्रियाकलापहरू हुँदै आएका छन् ।