भाद्र २९, मकवानपुर ।
विद्यार्थीहरूको आ-आफ्नो रोजाइअनुसार नृत्य, गायन, रचना वाचनलगायतका गतिविधिहरू गराउँदै जनप्रिय मा.वि. ले बालदिवस विशेष कार्यक्रम सम्पन्न गरेको छ ।
‘मञ्च एक, प्रतिभा अनेक’ नाम दिइएको उक्त कार्यक्रममा विद्यालय व्यवस्थापन समिति सदस्य कृष्णप्रसाद पनेरूको प्रमुख आतिथ्यता र माध्यमिक तह नेपाली माध्यम संयोजक नीरबहादुर खड्काले सभाध्यक्षता गर्नुभयो ।
करीब ६५ जना विद्यार्थीहरूले आफूमा निहित प्रतिभा प्रस्तुति गरेको अंग्रेजी माध्यम संयोजक रविन श्रेष्ठले बताउनु भयो ।
बर्खे विदाको समयमा विद्यालयले विभिन्न सीप र क्षमतासँग सम्बन्धित कार्यशाला सञ्चालन गरेको थियो भने अहिले यसैको निरन्तरता रहेकोले आफू निकै हर्षित रहेको भन्दै सदस्य पनेरूले सहभागीलाई व्यक्तिगत रूपमा पुरस्कार समेत प्रदान गर्नुभयो ।
कार्यक्रमको सहजीकरण सञ्चार विभाग संयोजक सुनिल गौतमले गर्नु भएको हो ।