भाद्र २९, हेटौँडा, आज देशै भर ५९ औँ राष्ट्रिय बालदिवस विभिन्न कार्यक्रमहरूको आयोजना गरि मनाइयो l यसै सन्दर्भमा शहिद स्मारक, हेटौँडा स्थित हेटौँडा एकेडेमीमा “हेटौँडा एकेडेमी बाल समूह” ले एक विशेष कार्यक्रम आयोजना गरि ५९ औँ राष्ट्रिय बालदिवस भव्य रुपमा मनायो l
हेटौँडा एकेडेमीकै प्रमुख कार्यकारी अधिकृत रमेश रिमाललाई प्रमुख अतिथि र प्राचार्य गौरिदेवी चिमरियालाई विशिष्ठ अतिथि बनाइएको कार्यक्रमको अध्यक्षता हेटौँडा एकेडेमी बाल समूहका अध्यक्ष एवं कक्षा १० का विद्यार्थी सुरज कुमार चौरसियाले गरेका थिए l “बालबालिकामा लगानी : सुनिश्चित भविष्यको थालनी” भन्ने नाराका साथ हेटौँडा एकेडेमीको प्राङ्गणमा आयोजित कार्यक्रममा कक्षा नर्सरी देखि कक्षा १० सम्मका विद्यार्थीहरूले नृत्य र गायन विधामा आफ्नो प्रतिभा प्रस्तुत गरेका थिए l
उक्त कार्यक्रमलाई सम्बोधन गर्दै प्रमुख अतिथि रिमालले बाल दिवसले बालबालिकाहरू तथा अन्य सरोकारवालाहरूलाई बाल अधिकार तथा आजका बालबालिकाहरूलाई भोलिको जिम्मेवार नागरिकमा रुपान्तरण गर्नका लागि ध्यान पुर्याउनु पर्ने कुराहरूको बारेमा थप सचेत बनाउने विश्वास व्यक्त गर्नुभयो l बाल अधिकार संग संगै बालबालिकाहरूलाई कर्तव्य र असल संस्कार सिकाउनु पर्ने कुरामा रिमालले थप जोड दिनुभयो l उक्त कार्यक्रमलाई विद्यालयमा मा कक्षा ८ मा पढ्ने छात्रा क्रितिषा सापकोटा र कक्षा ७ मा पढ्ने छात्र पृथक रिमालले संचालन गरेका थिए l