पोखरा, ३१ भाद्र । अल्फा एकेडेमी, कालिका चोकमा तीज गीत प्रतियोगिता सम्पन्न भएको छ । कक्षागत रूपमा सम्पन्न प्रतियोगितामा कक्षा दस र सातका विद्यार्थी प्रथम स्थान ओगट्न सफल भएका थिए । त्यसैगरी कक्षा नौ दोस्रो, कक्षा आठ तेस्रो र कक्षा तीनले सान्त्वना स्थान ओगट्न सफल भए । कुल १२ ओटा समूह प्रतिस्पर्धामा सहभागी थिए । प्रतिस्पर्धीबाहेक विद्यार्थी तथा शिक्षकको तर्फबाट पनि विभिन्न प्रस्तुति दिइएको थियो ।
कक्षा नर्सरीकी शिक्षिका अनिता भण्डारीको अध्यक्षतामा सम्पन्न भएको कार्यक्रममा शिक्षिकात्रय ज्योति रानाभाट, पार्वती पतानी र आरती सापकोटा निर्णायकको भूमिकामा रहेका थिए । स्थानीय समाजसेवी मायादेवी रानाभाटको प्रमुख आतिथ्यतामा सम्पन्न कार्यक्रमको सञ्चालन शिक्षिका शकुन्तला लम्सालले गरेकी थिइन् भने सङ्गीता ओझाले स्वागत मन्तव्य व्यक्त गरेकी थिइन् । विद्यालयले हरेक वर्ष तीज गीत प्रतियोगितालाई विशेष रूपमा मनाउँदै आएको शिक्षिका ज्योति खनालले जानकारी दिइन् ।