३१ भाद्र, मकवानपुर
नवसर्जक साहित्य चौतारी नेपालको १५ ओैँ मासिक शृङ्खला बालदिवस विशेष कार्यक्रमका रूपमा भर्चुअल माध्यम (गुगल मिट) मार्फत सम्पन्न भएको छ ।
चौतारीकी केन्द्रीय अध्यक्ष प्रसन्ना चौलागाईँको अध्यक्षता एवम् चौतारीका सल्लाहकार एवम् नेपाल बालसाहित्य समाजका अध्यक्ष, बालसाहित्यकार तथा अन्वेषक प्रमोद प्रधानको प्रमुख आतिथ्यतामा सम्पन्न कार्यक्रममा चौतारीका संरक्षक एवम् परिकल्पनाकार दीपक गौतमको विशिष्ट आतिथ्यता तथा सल्लाहकार डिबी बर्तौलाको आतिथ्यता रहेको थियो ।
कार्यक्रममा विशेष रचना वाचकको रूपमा सहभागी केन्द्रीय उपाध्यक्ष एवम् लुम्बिनी प्रदेश संयोजक जोशिका कँडेल ‘निशा’ (कपिलवस्तु) ले आफ्ना प्रतिनिधि पाँच छन्द कविता वाचन गर्नु भयो । कार्यक्रममा चौतारीकी अध्यक्ष प्रसन्ना चौलागाईँ, महासचिव समर्पण न्यौपाने, वाग्मती प्रदेश सदस्य निमिशा निरौला, नवसर्जकहरू अजय बर्तौला, अनमोल पोखरेल र दृशिका कँडेलले कविता वाचन गर्नुभयो भने सुदूरपश्चिम प्रदेश (बैतडी) का नवसर्जक पारस बोहराले गजल वाचन गर्नु भएको थियो ।
त्यस्तै नवसर्जक दीपिका खड्गीले देशभक्तिको भावयुक्त गीत गाउनु भयो । हरेक शृङ्खलामा पठन संस्कृति प्रबर्द्धनका लागि पुस्तक समीक्षा गर्दै आएकोमा आजको कार्यक्रममा चौतारीकी केन्द्रीय सदस्य तथा वाग्मती प्रदेश सहसंयोजक रोश्नी चौलागाईँले ‘शून्यको मूल्य’ उपन्यासको समीक्षा प्रस्तुत गर्नुभयो ।
डेढ दर्जन नवसर्जकको उपस्थिति रहेको कार्यक्रमको सहजीकरण चौतारीका महासचिव समर्पण न्यौपानेले गर्नु भएको हो । चौतारीले हरेक महिनाको अन्तिम शनिबार नियमित मासिक शृङ्खला आयोजना गर्दै आएको छ भने समयसमयमा विधाविशेष प्रशिक्षण अभियानका साथै प्रादेशिक एवम् राष्ट्रिय बालसाहित्य उत्सव आयोजना गर्दै आएको छ ।