बाबाले शरीर निचाेरेर
पसिना पठाइदिनुभएकाे थियाे
हजुरहरूले प्रेमपूर्वक
खाना खाइदिनुभयाे !
आमाले मुटु निचाेरेर
आँसु पठाइदिनुभएकाे थियाे
हजुरहरूले स्नेहपूर्वक
नाना लाइदिनुभयाे !
हजुरबाले छाती खाेलेर
सास पठाइदिनुभएकाे थियाे
हजुरहरूले धीत मर्ने गरी
गाना गाइदिनुभयाे
हजुरआमाले उज्यालाे भर्ने
रङ पठाइदिनुभएकाे थियाे
हजुरहरूले रङ्गीन बनाएर
पाना सजाइदिनुभयाे !
हामीले एक दुई थान कम्प्युटर देख्न नपाएर के भाे ?
हामीले कुनै प्रयाेगशाला टेक्न नपाएर के भाे ?
हामीले हाम्राे गुनासाे लेख्न नपाएर के भाे ?
हजुरहरू वडादेखि आइदिनुभयाे
हजुरहरू अड्डादेखि धाइदिनुभयाे
यी सारा प्रबन्ध मिलाइदिनुभयाे
र, सबै अनुमाेदन गराइदिनुभयाे !
यसरी धन्य भएर
हजुरहरूप्रति कृतज्ञ भएर
हामीले यसपालीकाे बालदिवस मनायाैँ !!
पुरुषोत्तम आचार्य, हेटौंडा मकवानपुर