असोज ९, मकवानपुर ।
चितवनका कवि गणेश श्रमणको कविता सङ्ग्रह ‘आगो लिएर गाउँगाउँमा’ दशैँमा सार्वजनिक हुने भएको छ ।
२०४६ सालको जनआन्दोलनबाट प्रभावित भएर कविता लेख्न सुरू गर्नु भएका उहाँका २०५७ सालमा ‘शब्दहरू अबिराम यात्रामा’ संयुक्त कविता सङ्ग्रह, २०६६ सालमा ‘शब्द क्रान्ति’ एकल कविता सङ्ग्रह र २०७५ मा ‘गुलियो काठमाण्डौं’ कथा सङ्ग्रह प्रकाशित छन् ।
फिनिक्स बुकद्वारा प्रकाशित ६० कविता सङ्ग्रहित उक्त कृतिका सम्बन्धमा प्रकाशकले लेखेको छ- उहाँ ठोस विषयवस्तुलाई अनुभूतिको तरलतामा कोमल भावमा द्रवणशील कविता लेख्नुहुन्छ । साथै कवितामा अनौठो आकर्षण र सम्प्रेषणीयता भएका कारण समकालीन कविपुस्ताको बृहत् समूहबाट आफूलाई पृथक पहिचानका साथ अलग्गै देखाउन सक्षम हुनुहुन्छ ।
उहाँले ‘बिरालोले काटेको बाटो’, ‘चोरहरूको देशमा’, ‘डमी ट्राफिक’, ‘हराएको जुत्ता’ आदि चर्चित कविताहरू लेख्नुभएको छ । २०४९ सालमा पहिलो कविता नव कविता पत्रिकामा छापिएको श्रमणका थुप्रै फुटकर कविताहरू विभिन्न पत्रपत्रिकामा प्रकाशन भएका छन् ।