मदन पुरस्कार विवेक ओझाको ऐँठन उपन्यासलाई र जगदम्बाश्री सम्मान टेकवीर मुखियालाई दिने निर्णय भएको छ ।
मदन पुरस्कार गुठीको बैठकले २०७९ सालको मदन पुरस्कार विवेक ओझाको उपन्यास ‘ऐँठन’लाई र जगदम्बा-श्री सम्मान कलाकार टेकवीर मुखियालाई अर्पण गर्ने निर्णय निर्णय गरेको छ ।
अक्षरलाई कलाको आवरणमार्फत पाठकसँग जोड्न तथा स्रष्टालाई मुहारचित्र मार्फत साहित्यानुरागी माझ पुर्याउन महत्त्वपूर्ण योगदान दिएकाले मुखियालाई जगदम्बाश्री सम्मान अर्पण गर्ने निर्णय गरिएको गुठीले जनाएको छ ।
६ दशकदेखि कला क्षेत्रमा सक्रिय मुखियाले लामो समय साझा प्रकाशनमा आबद्ध भएर पुस्तकका कभर डिजाइन गरेका थिए ।
त्यस्तै, विगतमा नेपाल एवं नेपाली समाजले बेहोरेको द्धन्द्धको दुःस्वप्न र अहिले पनि त्यस दुःस्वप्नले ऐँठनको पीडामा डुबाइरहेको यथार्थलाई उत्कृष्ट औपन्यासिक कलामार्फत् उपन्यासमा व्यक्त गरेका कारण ओझाको ऐँठनलाई मदन पुरस्कार अर्पण गर्ने निर्णय गरिएको गुठीले जनाएको छ ।
ऐँठन लेखक ओझाको तेस्रो कृति हो । यसअघि उनका ‘ऐलानी’ र ‘एक पाइला आकाशमा’ पुस्तक प्रकाशित छन् ।
यसअघि मदन पुरस्कार गुठीले श्रेष्ठ पाँच पुस्तकको सूची प्रकाशित गरेको थियो । जसमा सुविन भट्टराईको इजोरिया, ओझाको ऐँठन, द्वारिकानाथ ढुङ्गेलको चक्रव्यूहमा नेपालको जलस्रोत, प्रगति राईको थाङ्ग्रा र सञ्जय विष्टको माटोको घर समावेश थिए । त्यसमध्ये ओझाको ऐँठनले मदन पुरस्कार प्राप्त गरेको हो ।
दुवै पुरस्कार तथा सम्मानको राशि चार लाख रुपैयाँ रहेको छ । २०७९ सालको मदन पुरस्कारका लागि ३१३ पुस्तक प्राप्त भएको गुठीले जनाएको छ । २०७८ सालको जगदम्बा-श्री सम्मान भाषा-साहित्यसेवी दुर्गाप्रसाद श्रेष्ठलाई र मदन पुरस्कार नवराज लम्सालको महाकाव्य ‘अग्नि’लाई प्रदान गरिएको थियो । जगदम्बाश्री २०४५ सालबाट र मदन पुरस्कार २०१३ सालबाट प्रदान गरिंदै आएको छ ।