मकवानपुर । साहित्य सदन नेपालले यस वर्षको गोपालप्रसाद रिमाल पुरस्कार कवि, निबन्धकार एवं समालोचक प्रा. जगत् उपाध्याय ‘प्रेक्षित’लाई प्रदान गरेको छ । सोही अवसरमा साहित्य सदन नेपालको पाँचौ साधारण सभा पनि सम्पन्न भएको छ । साधारण सभामा आयोजित कार्यक्रममा प्रमुख अतिथि वरिष्ठ साहित्यकार प्रा।डा।वासुदेव त्रिपाठीले गोपालप्रसाद रिमाल पुरस्कार कवि, निबन्धकार एवं समालोचक प्रा. उपाध्यायलाई प्रदान गर्नुभयो ।
प्रमाणपत्र र नगद बिस हजार रुपैयाँसहित सो पुरस्कार प्रदान गर्दै साहित्यकार त्रिपाठीले साहित्यिक क्षेत्रले समाज रूपान्तरण गर्न मद्दत गर्ने विचार व्यक्त गर्नुका साथै कवि पुरस्कृत उपाध्याय उत्कृष्ट कवि, निबन्धकार र समालोचक भएको बताउनुभयो । कार्यक्रममा विशेष अतिथि नेपाल प्रज्ञा प्रतिष्ठानका पूर्व कुलपति गंगाप्रसाद उप्रेतीले साहित्य सदन नेपाल जनस्तरबाट स्थापित प्रतिष्ठान भएको र यसले विभिन्न प्राज्ञिक कार्य गर्दै आएको विचार व्यक्त गर्नुभयो ।
साहित्य सदन नेपालका अध्यक्ष अमिर थापाले साहित्य सदन नेपालको महत्त्व र ऐतिहासिक पक्षका विषयमा प्रकाश पार्दै साहित्यका माध्यमबाट राजनीतिमा परिवर्तन गर्न सकिने बताउनुभयो । पुरस्कृत व्यक्तित्व प्राध्यापक जगत् उपाध्यायले आफू निरन्तर रूपमा निःस्वार्थ रूपमा साहित्यिक, प्राज्ञिक कर्ममा लागिरहेको बताउनुभयो ।शनिबार भएको साहित्य सदन नेपालको पाँचौँ साधारण सभाले प्राज्ञ प्रा.डा.हेमनाथ पौडेलको अध्यक्षतामा सर्वसम्मत रूपमा नयाँ कार्य समितिको चयन गरेको छ । नयाँ कार्यसमितिका उपाध्यक्षमा मित्रलाल पंगेनी, सचिवमा प्रल्ह्राद पोखरेल, सहसचिवमा डा. कृष्ण सुवेदी र कोषाध्यक्षमा वसन्त रिजाल चयन भएका छन् भने कार्य समिति सदस्यहरूमा विमल अर्याल, सीता भट्टराई, नवराज चालिसे, मणिराज लामिछाने, डा.गीता त्रिपाठी, कवि केशव सिलवाल, रमेश खनाल, त्रिलोचन आचार्य, माधवलाल श्रेष्ठ, पशुपति (श्याम) खतिवडा, सुनीता बुढाथोकी र विश्वनाथ तामाङ चयन भएका छन् ।
कार्यक्रममा साहित्यकार शान्ता मानवी, कवि प्रल्ह्राद पोखरेल, रामेश्वर फुयाँल, प्रभात दीक्षित आदिले समेत मन्तव्य राख्नुभएको थियो ।
साहित्य सदन नेपालको स्थापना २०४२ सालमा जनस्तरको प्रज्ञा–प्रतिष्ठानका रूपमा भएको थियो । कार्यक्रममा साहित्य सदन नेपालका सचिव मित्रलाल पंगेनीले साहित्य सदनका गतिविधि र भावी योजना पेस गर्नुभएको थियो भने कोषाध्यक्ष वसन्त रिजालले संस्थाको आर्थिक प्रतिवेदन प्रस्तुत गर्नुभएको थियो । कार्यक्रमको सहजीकरण प्रह्लाद पोखरेलले गर्नुभएको थियो ।