आश्विन २६, मकवानपुर ।
हेटौंडा-१६, चिसापानीमा रहेको जनप्रिय माविमा ‘मञ्च एक प्रतिभा अनेक’ कार्यक्रम सम्पन्न भएको छ ।
कार्यक्रमको अवसरमा शिक्षकहरूका साथै नर्सरीदेखि १२ कक्षासम्मका विद्यार्थीहरूको गायन, नृत्य, रचना वाचन लगायत कार्यक्रमहरू गरिएका छन् । कक्षा १२ ले कक्षा ११ लाई स्वागत गरी सुरू भएको कार्यक्रम जनप्रिय माविका विव्यस अध्यक्ष रमेशप्रसाद खतिवडाको अध्यक्षता र १६ नं. वडा अध्यक्ष रामकृष्ण कोइरालाको प्रमुख आतिथ्यता रहेको थियो । चाडपर्वको अवसरमा साँस्कृतिक कार्यक्रम गरी दसैं, तिहार र छठको शुभकामना आदान प्रदान गरिएको अतिरिक्त तथा साँस्कृतिक विभाग संयोजक युक्तलाल विश्वकर्माले जानकारी दिनुभयो ।
कार्यक्रममा सामुहिक नृत्य, सामुहिक गायनका साथै शिक्षक सुनिल गौतमले लेख्नु भएको विद्यालय गीत गाइएको थियो ।
विव्यस सदस्य कृष्णप्रसाद पनेरूले विद्यार्थीहरूले नै सञ्चालन गरी उनीहरूकै प्रतिभा प्रष्फुटन गराउने उद्देश्यले सञ्चालित यस्ता कार्यक्रमहरू निरन्तर सञ्चालन भैरहेकोले भविष्यमा पनि यसले निरन्तरता पाउने बताउनुभयो । यस्तै प्रधानाध्यापक भुपेन्द्र चौलागाईँले विद्यालयका शिक्षक, विद्यार्थी र विद्यालय व्यवस्थापन समिति सबैको मद्दतले यत्ति भव्य कार्यक्रम बनेको र निरन्तर सहयोगको अपेक्षा गर्दै चाडपर्वको शुभकामना व्यक्त गर्नुभयो ।
सिटिइभिटी संयोजक मोतिउर रहमान, अंग्रेजी माध्यम संयोजक रविन श्रेष्ठ, नेपाली माध्यम संयोजक नीरबहादुर खड्का, सहायक प्रधानाध्यापक रामआशिष मण्डल, शिक्षकहरू नमराज अर्याल, सुनिल गौतम आदिले धन्यवाद तथा शुभकामना मन्तव्य राख्नुभएको कार्यक्रममा पिटिए अध्यक्ष गुणराज राना, सदस्य राजन दहाल र कमला धिमालको उपस्थिति रहेको थियो । प्रविधि संयोजन अभिषेक बास्तोला र राजन तिमल्सिनाले गर्नु भएको कार्यक्रमलाई एन.एस. टेलिभिजनले छायाङ्कन गरेको थियो भने दिवा सत्रको कार्यक्रमलाई कक्षा ९ का विद्यार्थीहरू प्रख्यातमान लो र बिबिशा खड्काले सञ्चालन गर्नुभएको हो ।