कालिकोट निवासी ध्रुव सञ्ज्याल हाल भरतपुर बसेर वीरेन्द्र बहुमुखी क्याम्पस भरतपुर चितवनमा बि. एस्सी. तेस्रो वर्षमा अध्ययनरत हुनुहुन्छ । उहाँ कविता, गजल, मुक्तकलगायतका विधामा कलम चलाउँदै आउनुभएको छ । उहाँ हाल शिक्षण पेसामा संलग्न रहनुभएको छ । -सम्पादक
मुक्तक १
देखिँदैनन् आफ्नाहरू अक्सर शून्य शून्य लाग्छ
अनि लाग्दैन कसैको पनि भर शून्य शून्य लाग्छ
तिमीबिनाको एक पल मात्रै हो नरमाइलो लाग्ने
मलाई मेरी आमाबिनाको घर शून्य शून्य लाग्छ ।
मुक्तक २
यहाँ मान्छेको क्षमताको मापन कसरी हुन्छ ?
र क्षमता पत्ता लगाउन अध्यापन कसरी हुन्छ ?
म लजाउँछु गाउँको आँटो र गुन्द्रुकको प्रचार गर्न
तर यो बजारमा शरीर बेच्ने विज्ञापन कसरी हुन्छ ?
मुक्तक ३
चुनाव आउँदा पो खाँचो पर्छ हजुरलाई
अनि भएभरका गफ दिएर टर्छ हजुरलाई
मजदुरको पसिनाको मूल्यको के चासो ?
कुर्सी हराउँछ कि भन्ने डर छ हजुरलाई ।
ध्रुव सञ्ज्याल, कालिकोट