असोज २९, मकवानपुर ।
विद्यार्थीहरूलाई दसैंको महत्व दर्शाउनेगरी जनप्रिय मावि, हेटौँडा-१६ ले दसैं विशेष कार्यक्रम गरेको छ । कार्यक्रममा शिक्षक शिक्षिकाहरूबाट विद्यार्थीहरूलाई टिका, जमरा लगाउँदै आशिष दिँदै शुभकामना आदानप्रदान गरिएको छ ।
विद्यार्थीहरूलाई चाडबाडको समयको विदा गर्नुअघि चाडपर्वको खुशियाली साटासाट गर्नेगरी नमुना कार्यक्रमस्वरूप यस कार्यक्रम गरिएको तथा प्रधानाध्यापकको कार्यसम्पादनमार्फत् प्राप्त रकमबाट विद्यार्थीहरूलाई दक्षिणाको व्यवस्था समेत गरिएको प्रधानाध्यापक भुपेन्द्र चौलागाईँले बताउनुभयो ।
विद्यालय व्यवस्थापन समितिका अध्यक्ष रमेशप्रसाद खतिवडा, विद्यालय व्यवस्थापन समिति सदस्य कृष्णप्रसाद पनेरू, विद्यालयका शिक्षक, कर्मचारी संलग्न कार्यक्रममा शिक्षकहरूले नर्सरीदेखि कक्षा १० सम्मका विद्यार्थीहरूलाई टिकाजमरासहित विदाइ गरेको हो । यस्तै शिक्षकहरूलाई समेत प्रधानाध्यापक तथा सहायक प्रधानाध्यापकले टिका लगाइदिनु भएको थियो ।
यस्ता कार्यक्रममा मिश्रित प्रतिक्रिया मिल्ने भएता पनि कार्यक्रमले खुशी साटासाट गर्ने, चाडबाड मिलेर मनाउनुपर्छ भन्ने सन्देश दिनुका साथै सामाजिक विषयका पाठहरू अध्ययन अध्यापनका क्रममा विद्यालयले गर्ने अतिरिक्त क्रियाकलापकै रूपमा यसलाई बुझ्नुपर्ने सामाजिक विषयका शिक्षक रविन श्रेष्ठले बताउनुभयो ।
विद्यार्थीकेन्द्रित कार्यक्रमहरूमा ध्यान दिँदै उनीहरूको शारीरिक, मानसिक र संवेगात्मक विकासका विविध कार्यक्रमहरू गर्दै आइरहेकोले यस्ता कार्यक्रमबाट बालबालिकाले शिक्षकहरूसँग निर्धक्क रूपमा सिकाइ क्रियाकलापमा सहभागी हुन हौसला मिल्ने विद्यालयका सहायक प्रधानाध्यापक रामआशिष मण्डलले जानकारी दिनुभयो ।