ललितपुर निवासी सदा निहारिका गजल, कविता, मुक्तकलगायतका विधामा सक्रियतापूर्वक आफ्नो कलम चलाउँदै आउनुभएको छ । उहाँ गोदावरी साहित्य प्रतिष्ठान र सुनगाभा साहित्य प्रतिष्ठानमा आबद्ध रहनुभएको छ ।– सम्पादक
गजल
कसले सक्छ र यति मिलाएर गर्न बयान हजुरको
र त आफू आफैँ गाउनुहुन्छ गुणगान हजुरको ।
दिनभरिको पापको मोक्ष हुन्छ कि हुन्न होला
बित्छ सँधै मन्दिर चाहार्दै बिहान हजुरको ।
आचीमै खसेको पैसा पनि मुखैले टिपुँ झैँ गर्नुहुन्छ
होला पैसाकै चिता सुनकै चिहान हजुरको ।
उचाइमा हुँदा बडो ख्याल गर्नुहोस् सानाहरूसँग
नाथे चराले पनि खसाल्न सक्छ विमान हजुरको ।
सदा निहारिका, ललितपुर