श्रावण ६, हेटौँडा
मातृभूमि साहित्य साहित्य समाज मकवानपुरले ६ जना साहित्यिक सर्जकहरू तथा १ सञ्चारकर्मीलाई सम्मान गरेको छ ।
दुई दिवसीय पुरस्कार समर्पण तथा रचना वाचन कार्यक्रमको अवसरमा देशका विभिन्न क्षेत्रका व्यक्तित्वहरू सम्मानित हुनु भएको हो ।
कार्यक्रमको पहिलो दिन मकवानपुरका साहित्य सर्जक आरआर चौलागाईँलाई श्याम श्रेष्ठ स्मृति मातृभूमि साहित्य सम्मान, साहित्यकार डा. शैलेन्दुप्रकाश नेपाललाई ईश्वरी स्मृति मातृभूमि पुरस्कार, चितवनका छन्द कवि लकाश पौडेललाई होमनाथ-बलदेवी मातृभूमि छन्द पुरस्कारबाट सम्मानित गरिएको छ । प्रत्येक पुरस्कार राशी १५ हजार रुपैयाँको रहेको थियो । यस्तै शेखर शर्मा रिजाल स्मृति मातृभूमि शैक्षिक सम्मानबाट व्यक्तित्वद्वय रामचन्द्र आचार्य फुर्सती र अमर माध्यमिक विद्यालयकी प्रअ मालती उप्रेती सम्मानित हुनु भएको छ ।
कार्यक्रमको दोस्रो दिन मातृभूमिका अध्यक्ष माधव पोख्रेलको सभाध्यक्षता र चितवन साहित्य परिषदका अध्यक्ष केदार खनालको प्रमुख आतिथ्यता रहेको शनिबारको कार्यक्रममा महालक्ष्मी बैङ्क हेटौंडा शाखाद्वारा प्रायोजित ५१ हजार राशीको ‘महालक्ष्मी साहित्य पुरस्कार २०८०’ बाट प्राध्यापक डाक्टर गोविन्दराज भट्टराईलाई समर्पण गरिएको छ । वर्ष २०७९ मा यस सम्मानबाट साहित्यकार श्रवण मुकारुङ सम्मानित हुनु भएको थियो ।
साथै मातृभूमिले ७ हजार राशीको ‘केशवलाल स्मृति पत्रकारिता पुरस्कार २०८०’ बाट पत्रकार तथा प्राध्यापक सुरेश श्रेष्ठलाई सम्मानित गरेको छ । ईश्वर मैनालीले आफ्नो बुबाको स्मृतिमा स्थापना गरेको यस पुरस्कार पत्रकारिता पेशामा अविछिन्न सेवामा रही जनतालाई सुसूचित गर्नु भएकोमा प्रदान गरिएको हो । पत्रकार श्रेष्ठ पुस्तकालय अभियानका अभियन्ता समेत हुनुहुन्छ ।
अनुवादमा पहिलो विद्यावारिधि गर्नुभएका पुरस्कृत व्यक्तित्व भट्टराईका अनुवाद कृति, उपन्यास तथा अनुसन्धानात्मक गरी कूल ६५ कृतिहरू प्रकाशित छन् । उहाँले विश्व साहित्यका अध्ययन गर्दै परिस्कृत हुँदै विश्व चेतना भर्न सक्ने साहित्य सिर्जना गरिरहन आह्वान गर्नुभयो । साथै अर्का पुरस्कृत व्यक्तित्व पत्रकार श्रेष्ठले कार्यक्रममा सञ्चार माध्यमले समाजमा चेतनाका लागि प्रयास गरिरहेको र त्यसमा साहित्य सिर्जनाबाट अझै मलजल पुग्ने बताउनुभयो ।
कार्यक्रममा सम्मानित हुनुहुँदै पत्रकार सुरेश श्रेष्ठ
कार्यक्रममा सर्जकहरू सानु खनाल, आयुषा खनाल, किशन पौडेल, सुवास तामाङ, सुवास खनाल, बैकुण्ठ लामिछाने, देवराज लामिछाने आदिले रचना वाचन गर्नुभएको थियो ।
महालक्ष्मी विकास बैङ्कका क्षेत्रीय प्रबन्धक शम्भुप्रसाद पराजुली, हेटौंडा शाखाका मेनेजर अनन्त धिताल, बैङ्कका कर्मचारीहरुलगायत स्रष्टाहरू केशवराज आमोदी, गोविन्दराज विनोदी, धनराज गिरी, विष्णुप्रसाद पौडेल, पुष्प अधिकारी अञ्जली, मातृभूमिका संरक्षक एवम् संस्थापक हयग्रीव आचार्य, सल्लाहकार देवराज खरेल, मातृभूमिका उपाध्यक्ष कृष्णप्रसाद दाहाल, नेपाली लेखक संघ मकवानपुरका अध्यक्ष छवि अनित्य, सिस्नुपानी नेपाल मकवानपुरका अध्यक्ष राजकुमार लामिछाने, मुक्तक मञ्च मकवानपुरका अध्यक्ष डिबी बर्तौला, लघुकथा चौतारी मकवानपुर संयोजक किशन पौडेल, मुना अर्याल, भानुभक्त आचार्य, साहित्यसेवी मुक्तिगोविन्द वैद्य आदिको सहभागिता रहेको थियो भने कार्यक्रमलाई मकवानपुरको पहिलो साहित्यिक अनलाइन सञ्चार माध्यम एन.एस. टेलिभिजनका सञ्चालक महेन्द्र ओझाले छायाङ्कन गर्नु भएको थियो ।
रचना वाचन तथा सहभागिताका लागि मायाको चिनो प्रदान गरिएको पल्पसा प्याराडाइजमा सञ्चालित कार्यक्रमको सहजीकरण मातृभूमिका महासचिव हेमन्त ढुंगेल तथा सचिव मञ्जु खरालले गर्नुभएको थियो ।
संप्रस पौडेल, हेटौंडा, मकवानपुर
sampraspaudel2000@gmail.com