हेटौँडा उपमहानगरपालिका– १२, पदमपोखरी, मकवानपुर निवासी सानु खनाल पेसाले नेपाल टेलिकम, हेटौँडा शाखामा कार्यरत हुनुहुन्छ । उहाँ साहित्य सङ्गम, मकवानपुरको कार्यसमितिका उपाध्यक्ष हुनुहुन्छ । उहाँले मुक्तक, कविता, कथा, गजललगायतका विधामा कलम चलाउँदै आउनुभएको छ । – सम्पादक
मुक्तक १
बाहिर यस्तै त हो तन भित्र के केमा मन चलिरहेको छ
बाँचेको प्रमाण दिनलाई मुटुमा धड्कन चलिरहेको छ
कहिले फुरुक्क पार्छ सुखले कहिले हुरुक्क पार्छ दुःखले
जिन्दगी यस्तै रहेछ साथी ऐजन ऐजन चलिरहेको छ ।
मुक्तक २
जित मात्रैले पनि अभिमान बढ्छ हार सिकाउनुपर्छ
सुखदुःख दुइटा पाटा जीवनका सार सिकाउनुपर्छ
सन्तानको उन्नति प्रगतिमा साँच्चै गौरव गर्नु छ भने
सबैभन्दा पहिले उनीहरुलाई संस्कार सिकाउनुपर्छ ।
मुक्तक ३
रूप उस्तै देखिए तापनि त्यसको सार फरक हुन सक्छ
कसले कुन कोणबाट हेर्छ हेर्ने आधार फरक हुन सक्छ
विषय, परिवेश र हाम्रो चेतनाको गहिराइका कारणले
समान कुरामा हजुरको र मेरो विचार फरक हुन सक्छ ।
सानु खनाल, मकवानपुर