कार्तिक १२, सोमबार
मकवानपुर । लेखक मोहन मैनालीको इतिहासमा आधारित नविन पुस्तक ‘मुकाम रणमैदान’ बजारमा आउँदैछ ।
‘मान्ठा डराएको जुग’, ‘उपल्लो थलो’, ‘देखेको देश’, ‘आकाशमुखी’ जस्ता पाठकका प्रिय कृतिहरूका लेखक मोहन मैनाली एक स्थापित स्रष्टा हुनुहुन्छ । उहाँको अर्को अनुसन्धानमूलक कृति ‘मुकाम रणमैदान’ छिट्टै पाठकमाझ आउँदैछ ।
लेखक मैनालीले दसैँको खुशीका रूपमा यस पुस्तक पाठकमाझ समर्पण गर्नु भएको छ । पुस्तकका सम्बन्धमा मैनाली लेख्नुहुन्छ-
“१८७१–७२ सालको नेपाल–अंग्रेज युद्धमा खटिएका नेपाली र अंग्रेज सिपाही तथा कमान्डरले लेखेका प्रकाशित तथा अप्रकाशित, सार्वजनिक भइसकेका तथा अहिलेसम्म गोप्य राखिएका, पाएसम्मका सबै चिठी उधिन्न, ती चिठीका सजिलै चिन्न नसकिने अक्षर चिन्न, सजिलै बुझ्न नसकिने शब्द र भाषा बुझ्न र त्यो लडाइँबारे लेखिएका किताब तथा लेख पढ्नमा दुई वर्ष बिताएँ । तिनबाट पाएका जानकारीलाई लेख्न, केर्न अनि दोहोर्याई तेहेर्याई लेख्न लामो समय, धेरै धैर्य र मेहनत खर्च गरेँ । परामर्श, सम्पादन, साजसज्जा र इलेक्ट्रोनिक तथा बोल्ने संस्करण तयार गर्नमा धेरै जनाले कठोर परिश्रम गरिदिनुभयो । त्यसैको फल हो यो किताब ।
पूर्वमा टिस्टादेखि पश्चिममा सतलज नदीसम्मका रणमैदानमा भएका सानाठूला लडाइँ, सुगौली सन्धी, चीनसँग गुहार मगाईलगायतका विषय समेटिएको यस किताबले त्यस लडाइँको पूर्ण चित्र प्रस्तुत गरेको छ । त्रिहत्तर हजार शब्दको मूल पाठ र १३ हजार शब्दको फुटनोट भएको यो किताब २६ खण्डमा विभाजित छ ।
यस किताबका कुनै पनि वाक्य यसअघि कतै प्रकाशित भएका छैनन । त्यसैले ती ताजा र चोखा छन् ।
यस किताबका मुद्रित (बाक्लो र पातलो गाता), इलेक्ट्रोनिक र बोल्ने संस्करण चाँडै, मुद्रित संस्करण प्रेसबाट आउनासाथ पाठकसमक्ष समर्पण गरिनेछन् ।”
इतिहासको अध्ययन, अनुसन्धानमा निकै मेहनतका साथ समय बिताएपछि इतिहासमा रुचि हुने पाठकलक्षित पुस्तकाकारका रूपमा आएको ‘मुकाम रणमैदान’ लाई प्रकाशक बुक हिलले बजारमा ल्याउन लागेको हो ।