बालसाहित्य लेखनको एउटा ऐतिहासिक व्यक्तित्वको अन्त्य
कार्तिक २८, मकवानपुर ।
एउटा समय थियो, जतिखेर शान्तदास मानन्धरका बुवाले अनुनय गरेर छोरालाई स्कुल भर्ना गर्न पाउनु भएको थियो । उनै शान्तदास मानन्धरको ९० वर्षको उमेरमा कार्तिक २८ गते निधन भएको छ ।
पारिजात बाल साहित्य सम्मान २०७०, देवकोटा लु–सुन प्रज्ञा पुरस्कार २०७४, जगदम्बाश्री सम्मान २०७५, विकल वाङ्मय साहित्य पुरस्कार २०७७, साहित्य-सृष्टि बालवाङ्मय साधना सम्मान-२०७९ लगायत धेरै सम्मान तथा पुरस्कारले सम्मानित उहाँले बालकोसेली, बालपोष, मचाक्यब नामका बालसाहित्यिक पत्रिका सम्पादन तथा प्रकाशन गर्नुभएको थियो । ४ दशक त उहाँले बालकोसेली पत्रिका नै प्रकाशन गर्नुभएको थियो ।
६ दशकभन्दा लामो समयसम्म बालसाहित्य लेखनमा आफ्नो जीवन समर्पण गर्नु भएका उहाँले राणाकालदेखि नै बालबालिकाहरूका लागि कथा, कविता, गीत, चित्र आदि बनाउँदै त्यसलाई पुस्तकाकार गर्दै आउनु भएको थियो ।
पाठ्यपुस्तक र बालसाहित्यबीच फरक छ भनेर बुझाउँदै आउनु भएका उहाँले शिक्षक र अभिभावकले समेत यो बुझ्न जरूरी छ भन्ने कुरा जीवनभर सिकाउँदै आउनुभयो ।
राणाकालदेखि प्रजातन्त्रप्राप्तिपश्चात् समेत बालसाहित्यका रूपमा पञ्चतन्त्र, भजनहरू, पाठ्यपुस्तकमा उपदेशका कुराहरू मात्र उल्लेख गरिएकामा उहाँलाई त्यसले चित्त नबुझी बालबालिकाकै भाषामा लेखन गर्नुपर्ने उत्प्रेरणाकासाथ यस क्षेत्रमा लाग्नु भएको हो ।
चिनियाँ लेखक लु सुनका कथाहरू पहिलो पटक नेपालीमा अनुवाद गर्नु भएका उहाँले ७० बढी पुस्तक लेखन र १५० बढी बालसाहित्यका पुस्तक सम्पादन गर्नु भएको छ । अनुवाद साहित्यमार्फत् अन्य भाषाका रचनालाई समेत नेपालीमा प्रकाशन गराउनु भएका उहाँले बालबालिकाका लागि यथेष्ट रचनाहरू दिएर विदा हुनु भएको छ ।
नवसाहित्य अनलाइन परिवार उहाँको निधनप्रति हार्दिक श्रद्धासुमन अर्पण गर्दछौं ।