कार्तिक ३०, बिहीबार मकवानपुर ।
नवसर्जक साहित्य चौतारी नेपालद्वारा हेटौंडामा विभिन्न साहित्य सर्जक तथा साहित्यानुरागीहरूकहाँ देउसीभैलो कार्यक्रम गरेको छ ।
चौतारीका अध्यक्ष प्रशन्ना चौलागाईँले यस कार्यक्रममार्फत् सङ्कलित रकम नवसर्जक साहित्य चौतारीको अक्षयकोष निर्माणमा उपयोग गरिने लक्ष्यस्वरूप यस कार्यक्रम गरिएको बताउनुभयो ।
यस्तै चौतारीका महासचिव समर्पण न्यौपानेले देउसी भैलो कार्यक्रममा विभिन्न संस्थामा आबद्ध भएका तथा नभएका साहित्य सर्जकहरूको निरन्तर सहयोग रहिरहेको जानकारी दिनुभयो ।
मंगलबार पहिलोदिन साहित्यसेवी मुक्तिगोविन्द वैद्य र विनोद सुवेदीको घरमा देउसी भैलो खेलेको चौतारीले दोस्रो दिन बैङ्कर तथा साहित्यसेवी नुरप्रसाद गौतम, बालमैत्री होस्टेल र जनक मार्ग टोलमा देउसी सम्पन्न गरेको थियो ।
साहित्य सर्जकहरूको साथमा २ दिनसम्म देउसी भैलो खेलिएको चौतारीका संरक्षक दीपक गौतमले बताउनुभयो । देउसी भैलोबाट कूल ३२ हजार रुपैयाँ सङ्कलन गरिएको र अन्य दाताहरूमार्फत् रकम सङ्कलन गरी अक्षयकोष निर्माण गर्ने तथा सोमार्फत् चौतारीका नियमित कार्यक्रम सञ्चालन, पुस्तक प्रकाशन, पुस्तक विमोचन, पुरस्कार वितरणमा सघाउ पुग्ने संस्थाको अपेक्षा रहेको उहाँले जानकारी दिनुभयो ।