ओ वीराङ्गना !
के थियो तिम्रो नाम ?
कि तिम्रो कुनै नामै थिएन ?
को थिए तिम्रा बाआमा ?
को थिए तिम्रा दाजुभाइ र दिदीबहिनीहरू ?
को थियो तिम्रो लोग्ने ?
को थिए तिम्रा आफन्तहरू ?
कसैले सुनाएनन् तिम्रो नाम ?
ओ वीराङ्गना !
के थियो तिम्रो नाम ?
कि तिम्रो कुनै नामै थिएन ?
नालापानीको युद्धमा
अल्मोडा र काँगडाका युद्धमा
भोट तिव्वततिरका युद्धमा लडिरहदा
तिमीजस्तै वीर विरङ्गनाहरूले कहिल्यै पनि लिएनन् तिम्रो नाम ?
चम्किरहँदा तिम्रो खुकुरी त्यहाँ
बोलाएनन् तिमीलाई तिम्रो नाम पुकारेर कसैले ?
तिमी ढल्दा जमिनमा मृत्युुलाई पछारेर
माटोमा लेखिएन रगतले तिम्रो नाम ?
ओ वीराङ्गना !
के थियो तिम्रो नाम ?
कि तिम्रो कुनै नामै थिएन ?
शत्रुका शिरमाथि तिम्रो खुकुरी नाचिरहँदा
तिम्रो पिठ्यूमा मजेत्रोले बाँधिएको बालक को थियो ?
तिनका रगतका छिर्काहरूले
शिरदेखि पाउसम्म निथ्रुक्कै भिजेको त्यो बालक को थियो ?
उम्लिरहेको तातो रगत धर्तीलाई चढाएर
तिमी स्वयम् धर्ती बनेपछि
पाउले माटोमा रगतका छाप लगाउँदै
टुकुर टुकुर हिड्ने त्यो बालक को थियो ?
ओ वीराङ्गना !
तिमीसँगै ढलेको खुकुरीको बिँड समातेर
दुई हातले खुकुरी उचाल्ने त्यो बालक को थियो ?
म हैन
म हैन
साँच्चै म हैन त्यो बालक
साँच्चै म हैन त्यो बालक
त्यो बालकको सृष्टिश्रृङ्खलाको शायद अंश पनि म हैन
छामिरहेको छु म मेरो आफ्नो रगत बारम्बार
मेरो रगत तातो छैन तिम्रो जस्तो
चिसो छ
मेरो रगत चिसो छ
नुन पग्लेर बगेको चिसो पानी जस्तो छ मेरो रगत
म हैन त्यो बालक
मेरो रगत तातो छैन ।
युद्धमा शत्रुको रगतले
तिम्रो पिठ्यूमा निथ्रुक्कै भिजेको त्यो बालक म हैन
तिम्रो खुकुरी धर्तीबाट उठाउने
त्यो बालक म हैन
भक्भकी उम्लिरहको रगतको तेजले
शत्रुलाई ललकार्ने ओ वीरङ्गना !
तिम्रो सन्तानको नाम मलाई योग्य भएन
मलाई माफ गर
मेरो रगतमा तिम्रो रगतको तातोपन पटक्कै छैन
मेरो रगत चिसो छ, चिसो
को होलान् तिमीजस्तै तिम्रा वीर सन्तान ?
खोजिरहेछु तिनलाई म घर-घरमा
बाटो-बाटोमा, बस्ती-बस्तीमा
यो सिङ्गै देशमा म खोजिरहेको छु तिनलाई ,
यो देशलाई तातो रगत भएको सन्तान चाहियो
तिम्रो जस्तै तातो रगत भएको
भक्भकी रगत उम्लिरहेको तिम्रो सन्तान चाहियो ।
नामविनै मरेकी
र नामविनै बाँचिरहेकी
ओ विराङ्गना !
के थियो तिम्रो नाम ?
कि तिम्रो कुनै नामै थिएन ?