मङ्सिर १८, सोमबार
मकवानपुर ।
जनप्रिय मा.वि. हेटौंडा १६ ले आफ्नो ४७ औं वार्षिकोत्सवमा आयोजित विविध खेलकूद कार्यक्रम तथा पुरस्कार वितरण समारोह सम्पन्न गरेको छ ।
शुक्रबार आयोजित खेलकूद कार्यक्रमका विजेता १७० विद्यार्थीहरूलाई सोमबार एक समारोहबीच मेडल तथा प्रमाणपत्र वितरण गरिएको हो । पुरस्कार वितरण समारोह विद्यालयका प्रधानाध्यापक भुपेन्द्र चौलागाईँको अध्यक्षता र शिक्षा विकास महाशाखाका शिक्षा अधिकृत रमेश बिडारीको प्रमुख आतिथ्यता तथा अक्कलबहादुर थिङको आतिथ्यतामा आयोजना भएको थियो । विद्यालयका शिक्षक र सम्पूर्ण विद्यार्थीहरूको उपस्थितिमा तहगत रुपमा लक्षित गरी आयोजित १३ विधाका खेलकूद क्रियाकलापका विजयी बालविकासदेखि कक्षा १२ सम्मका विद्यार्थीलाई सम्मान गरिएको हो ।
माध्यमिक तहका जिम्नास्टिक खेलका लागि मालती फयल, नम्रता शर्मा, अजन्ता पराजुली आदिले संयोजन रहेको थियो भने सोही तहका भलिबल तथा बास्केटबल खेलका लागि रविन श्रेष्ठ, विजय थिङका साथै आधारभूत तहका लागि नम्रता शर्मा, भावना चौलागाईँ, करूणा महत, श्रृजु ढकाल, रामकृष्ण बिक, आशिष बल आदिले खेल तथा पुरस्कार वितरण कार्यलाई व्यवस्थित गर्नु भयो ।
प्राथमिक तथा पूर्व प्राथमिक तहमा दीपिका तिमल्सिना, यशोदा भट्टराई, घनश्याम ढकाल, सीता दाहाल, अमृता गौतम आदिले खेल तथा पुरस्कार वितरण कार्यलाई संयोजन गर्नुभएको थियो ।
आधारभूत तहसम्मका लागि बेलुन नाच, जोडी बोक्ने खेल, हिसाब दौड, १०० मिटर दौड, म्युजिकल चियर आदि क्रियाकलाप तथा माध्यमिक तहमा बास्केट बल, भलिबल, लङ्ग जम्प, ट्रिपल जम्प आदि खेलकूद क्रियाकलाप गराइएको र यसले विद्यार्थीको शारीरिक विकासका साथै मानसिक विकासमा टेवा पुग्ने र नियमित अभ्यासतर्फ लाग्न प्रेरित हुने अपेक्षा लिइएको विद्यालयका प्रधानाध्यापक चौलागाईँले बताउनुभयो । तहगत रूपमा विद्यार्थीको मनोभावनाअनुसारका खेलकूद क्रियाकलापलाई शिक्षकहरूलाई विभिन्न समूहमा विभाजन गरी व्यवस्थापन गराउँदा शिक्षकहरूमा अपनत्व बढ्ने तथा विद्यार्थीहरूमा पढाइका अलावा हुने पुनर्ताजगी महसुस गराउनुका साथै उनीहरूमा रहेको प्रतिभालाई प्रष्फुटन गराउने अवसर यस्तै अतिरिक्त तथा सह-क्रियाकलापका माध्यमबाट मिल्ने उहाँको धारणा रहेको थियो ।
कार्यक्रममा विद्यालयका सहायक प्रधानाध्यापक रामआशिष मण्डल, अतिरिक्त तथा सास्कृतिक विभाग संयोजक युक्तलाल विश्वकर्मा, नेपाली माध्यम संयोजक नीरबहादुर खड्का, अंग्रेजी माध्यम संयोजक रविन श्रेष्ठ लगायत शिक्षकहरूको उपस्थिति रह्यो ।
विशेष जिम्मेवारी तोकिएका शिक्षक तथा कक्षा शिक्षकहरुले सम्वन्धित कक्षाका विजयी विद्यार्थीलाई पुरस्कृत गरेका थिए । अनुशासन विभाग तथा अंग्रेजी माध्यम संयोजक रविन श्रेष्ठको व्यवस्थापन, बौद्धिक तथा साहित्यिक विभाग संयोजक संप्रस पौडेलको संयोजन रहेको कार्यक्रमलाई जनप्रिय मिडिया संयोजक सुनिल गौतमले सहजीकरण गर्नु भएको हो ।