मङ्सिर २९, शुक्रबार
मकवानपुर ।
समृद्ध समाज राष्ट्रिय दैनिकले आफ्नो १४औं वार्षिकोत्सव मनाएको छ ।
वर्षैपिच्छे लेखक, पाठक, विज्ञापनदाता, शिक्षक, कर्मचारी, शुभेच्छुक लगायत भेला गरेर पुस्तक उपहार दिने गरेकोमा यो वर्ष पुस्तक सङ्कलन अभियान आयोजना गरेको हो । शुक्रबार होटल एभोकाडो एण्ड अर्किड रिसोर्टमा सङ्कलित पुस्तक सोही स्थानमा हेटौंडा अस्पतालका मेडिकल सुपरिटेन्डेन्ट डा. रामचन्द्र सापकोटालाई हस्तान्तरण गरिएको सम्पादक श्रेष्ठले जानकारी दिनुभएको छ । अस्पतालमा बिरामी र कुरूवाले त्यहाँ रहँदा अध्ययन गर्ने उद्देश्यले ती पुस्तकहरू सङ्कलन तथा हस्तान्तरण भएका हुन् । विगतदेखि नै पुस्तकालय अभियानअन्तर्गत पठन संस्कृतिको अगुवाईमा सँगसँगै रहेका सहयात्री रविन श्रेष्ठले समृद्ध समाजको यस अभियानले अस्पतालको वातावरण अझ सुन्दर हुनुका साथै ती पुस्तकहरू अस्पताल अवधिभर अध्ययन गरी अस्पतालमैं सुरक्षित रहने हुँदा यसले खाली समयको उचित सदुपयोग हुने अपेक्षा गर्न सकिने बताउनु भयो ।
कार्यक्रममा बालबालिका, किशोरकिशोरी, युवा र वृद्धावस्था लगायत सबै उमेर समूहलाई लक्षित गरिएका साहित्य, शिक्षा, स्वास्थ्य, विज्ञान, धार्मिक, आध्यात्मिक, सामान्यज्ञान लगायत विभिन्न विषयमा सिर्जना गरिएका सयौं थान पुस्तकहरू सङ्कलन भएका छन् ।